АҚШда мигрантнинг суд залидан қочишига ёрдам берган судья ушланди

АҚШ федерал ҳукумати Висконсин штатининг Милуоки округи судьяси Ханна Дуганга қарши айбловларни илгари сурди. У одил судловга тўсқинлик қилганликда ва шахсни ҳибсдан қочишига ёрдам берганликда айбланмоқда.

Тергов маълумотларига кўра, у уйдаги зўравонликда айбланган Мексикадан келган ноқонуний мигрантга суд залидан чиқиб кетиш учун йўл кўрсатган. Шундай қилиб, айблов томонига кўра, у мигрантни йўлакда кутаётган иммиграция хизмати ходимларидан қочишига ёрдам беришга ҳаракат қилган. Қайд қилинишича, иммиграция ходимлари мигрантни суд ордерисиз ҳибсга олишга уринган.

Дуган қутқармоқчи бўлган Эдуардо Флорес-Руис ҳуқуқ-тартибот ходимларидан қочиб қутула олмади. Агентлар Флорес-Руисни суд биноси бўйлаб таъқиб қилди ва охир-оқибат кўчада ҳибсга олди. Ҳодиса 18 апрель куни содир бўлган.

Дуганнинг ҳибсга олингани 25 апрель куни маълум бўлди. «Ҳеч ким қонундан устун эмас», деди АҚШ бош прокурори Пэм Бонди ижтимоий тармоқда.

Дуганга айблов эълон қилиниб, гаров эвазига қўйиб юборилгани таъкидланмоқда. Намойишчилар суд мажлиси вақтида бино ташқарисига йиғилиб, судьяни зудлик билан озод этиш талабини билдиришди, деб хабар берди Reuters.

Ҳодиса АҚШда жамоатчилик норозилигига сабаб бўлган. Америка минтақаларининг бир қанча раҳбарлари судьяни қўллаб-қувватлаган. Жамоат арбоблари, фаоллар уни ҳимоя қилмоқда.