Трамп Вашингтон ва Миннеаполисдаги тартибсизликлар бостирилгани учун ўзини мақтади

АҚШ президенти Дональд Трамп Twitter’да АҚШ миллий гвардияси ва полиция ходимлари Миннеаполис ва Вашингтонда тартибсизликларни бостириш бўйича “ажойиб иш”ни амалга оширишганини ёзди. Бундан ташқари, камтарлиги билан унча ажралиб турмайдиган Трамп бунинг учун ўзига ҳам миннатдорлик билдирган.

Фото: Drew Angerer / Getty Images

“Колумбия округида ўтган тун ҳеч қандай муаммо бўлмади. Кўплаб ҳибсга олишлар ўтказилди. Барча томонидан қилинган ажойиб иш. Устунлик. Миннеаполис ажойиб бўлди (президент Трампга раҳмат!)”, деб ёзган АҚШ президенти.

Трамп Нью-Йоркда юз бераётган воқеаларга ҳам баҳо бериб ўтган. Унинг таъкидлашича, 1 июнда ака-ука Куомолар - Нью-Йорк штати губернатори Эндрю Куомо ва унинг укаси, CNN журналисти Крис Куомо учун ёмон кун” бўлди.

АҚШ президентининг таъкидлашича, Нью-Йорк шаҳрида “мародёрлар, каллакесарлар ва радикаллар” ҳаракат қилмоқда, губернатор эса президентнинг тартибсизликларни миллий гвардия кучлари билан бостириш таклифидан воз кечди. Шу сабабли, шаҳар “тилка-пора қилиб ташланди”. “Нью-Йорк, миллий гвардияни чақир. Каллакесарлар ва разиллар сизни тилка-пора қилмоқда”, деб ёзган Трамп.

АҚШда афроамерикалик Жорж Флойд полициянинг қўпол ҳаракатлари оқибатида ҳалок бўлгани туфайли бир неча кундан бери тартибсизликлар давом этмоқда. 46 ёшли Флойд 25 май куни Миннеаполисда қалбаки купюраларни қўллаш гумони билан қўлга олиниш вақтида ўлдириб қўйилган. Оқ танли полициячи Дерек Шовин Флойдни қўлга олиш вақтида унинг бўйнини тиззаси билан босиб турган. Бир неча соатдан кейин Флойд шифохонада жон берган. Қўлга олишни амалга оширган 4 полициячи ишдан бўшатилган, Шовинга эса эҳтиётсизлик туфайли қотиллик содир этиш айблови қўйилган.

#Вашингтон #тартибсизликлар #Дональд Трамп #Жорж Флойд