Илон Маск бадавлат инсонлар рўйхатида Уоррен Баффеттдан ўтиб кетди

 SpaceX компанияси асосчиси ва Tesla бош директори Илон Маск Berkshire Hathaway директорлар кенгаши раиси Уоррен Баффеттдан кўра бадавлатроқ кишига айланди, деб ёзмоқда Bloomberg.

Bloomberg Billionaires Index рейтинги маълумотларига кўра, Tesla акциялари нархи 11 фоизга қимматлашганидан сўнг Маскнинг бойлиги 6,1 млрд долларга кўпайди ва 70,5 млрд долларга етди.

Маск бирданига бир неча миллиардерни қувиб ўтиб, еттинчи поғонага жойлашди. У Баффеттдан ташқари, L'Oreal эгаси Франсуаза Бетанкур-Майерс, Oracle ҳаммуассиси Ларри Эллисон, Reliance Industires эгаси ва Осиёнинг энг бой кишиси Мукеш Амбани ҳамда Google ҳаммуассиси Сергей Бринни ортда қолдирди.

 Ушбу ҳафтада Баффетт 2,9 млрд доллар маблағини хайрияга сарфлагани сабабли унинг бойлиги камайди. 89 ёшли Баффетт 2006 йилдан буён 37 млрд доллардан ортиқ пулни хайрияга сарфлаган.

Илон Маск ўтган ҳафтада Лос-Анжелесдаги тўртта уйини сотишга қарор қилди. У аввалроқ шахсий уйга эга бўлмасликка аҳд қилганини айтганди.