ЎзМУ декан ўринбосари талабалардан ўқишга рўмолда келмасликни талаб қилгани учун узр сўради

«Кўпчиликни қизиқтираётган саволга жавоб шуки, бу ишларни бажаришга ҳеч ким мени мажбур қилмаган. Бирор бир ташкилот ёки [университет] раҳбарияти томонидан топшириқ бўлмаган. Бу ўзимни ёш кадр сифатида, касбий малакам етишмаслиги оқибати деб биламан. Шунинг учун шу хатоликка йўл қўйдим.

Алҳамдулиллаҳ, мусулмонман. Айтмоқчиманки, видеодан, мўмин-мусулмонлардан олган сабоғим шу бўлдики, мен хато қилдим ва буни тан оламан. Бунинг учун кенг жамоатчилик ва барча диндошларимдан ожизона узримни сўрайман», – дейди Равшан Омонов YouTube'даги Jsultonoff каналига берган интервьюсида.

{Yii::t(}

Ўтказиб юбориш 6s

Ўтказиб юбориш

Эслатиб ўтамиз, 2 апрель куни Омонов талабалар билан ўтказган мажлисда яширин ёзиб олинган видео ижтимоий тармоқларда тарқалди. Мажлисда декан ўринбосари талаба қизларга университет ҳудудига ибодат либосида келиш мумкин эмаслиги, бундай кийинган қизларни дарсга киритган ўқитувчиларга ҳам чора кўрилишини билдирган.

Шунингдек, у талабаларга бу тартиб тўғри келмаса, университетдан кетишни таклиф қилган.

Жамоатчиликнинг кескин норозиликларидан сўнг Равшан Омонов Facebook саҳифасида ва изоҳларда ўзининг шунчаки топшириқ ижрочиси эканини ва рўмолга қарши эмаслиги, буйруқни бажараётганини ёзиб чиқди. Лекин бир қанча вақтдан сўнг постини ҳам, изоҳини ҳам ўчириб ташлади.

Вазиятга изоҳ берган Олий ва ўрта махсус таълим вазирлиги ва ЎзМУ ректорати Равшан Омоновга талабаларнинг рўмол ўрашини тақиқлаш бўйича улар томонидан ҳеч қандай топшириқ берилмаганини маълум қилди.

Ёшлар билан ишлаш бўйича проректор Камолиддин Мирзааҳмедов ишга доир барча ҳолатлар аниқлангач, ЎзМУ жамоатчилик олдида очиқ ҳисобот беришини маълум қилган.