Жамият | 14:04 / 07.08.2021
13057
1 дақиқада ўқилади

Қашқадарёда ўтказилаётган тест синовларида уяли телефон ишлатган ва бошқалар ўрнига кирган шахслар аниқланди

Фото: ИИБ ахборот хизмати

Қашқадарё вилоятида олий таълим муассасаларига кириш учун ўтказилаётган тест синовларида уяли телефон ишлатган ва бошқалар ўрнига кирган шахслар аниқланган. Бу ҳақда вилоят ИИБ ахборот хизмати хабар бермоқда.

Маълум қилинишича, Қарши шаҳридаги «Насаф» ўйингоҳининг машғулотлар майдонида 2 босқичда олий таълим муассасаларига кириш учун тест синовлари ўтказилмоқда. Синовлар ўтказилаётган майдонга киришдан аввал абитуриентлар ҳар томонлама текширилмоқда.

Шундай бўлса ҳам айрим ёшлар маълум манфаат эвазига бировнинг ўрнига тест синовларини топширишга уринмоқда. Шунингдек, тест синовларига уяли алоқа воситаларини олиб киришга уринишмоқда. Ички ишлар ходимларининг саъй-ҳаракати билан бундай шахслар тўхтатиб қолинмоқда.

Жумладан, тест синовлари бошланган 5 августдан 7 август куни эрталаб ўтказилган синовларга ўзганинг ўрнига кирган 14 нафар, уяли телефондан фойдаланган 17 нафар, яширинча овоз эшитиш мосламасидан фойдаланган 4 нафар шахс аниқланган. Ҳозирда аниқланган ҳолатлар юзасидан суриштирув ишлари олиб борилмоқда.

Мавзуга оид