Алишер Султонов: Навоийда қурилаётган янги қуёш фотоэлектр станцияси 31 минг хонадонни электр энергияси билан таъминлайди

Президент ташриф доирасида қуввати 100 МВт бўлган қуёш фотоэлектр станцияси барпо этилган “Nur Navoiy Solar” хорижий корхонаси билан танишади ва унинг фаолияти бошланганини англатувчи рамзий дастакни ишга туширади. 

Kun.uz мухбири тадбир олдидан ушбу объектда энергетика вазири Алишер Султонов ҳамда “Ҳудудий электр тармоқлари” АЖ раиси Улуғбек Мустафоев билан суҳбатлашди.

Алишер Султоновнинг қайд этишича, Кармана туманида барпо этилаётган мазкур қуёш фотоэлектр станцияси 268 гектар майдонни эгаллаган бўлиб, лойиҳанинг умумий қиймати 110 млн долларни ташкил этади. Янги қуёш фотоэлектр станциясининг ишга туширилиши натижасида ўртача 31 минг хонадон электр энергияси билан таъминланади.

“Ҳудудий электр тармоқлари” АЖ раиси Улуғбек Мустафоевнинг маълум қилишича, ушбу лойиҳанинг бош пудратчиси Хитойнинг “Сепко III” компанияси ҳисобланади.

Станция йилига 260 млн кВт/соат электр энергияси ишлаб чиқариш қувватига эга. Электр энергиясини сотиш тарифи — 2,679 цент, газ тежамкорлиги — 78,7 млн куб метр.

Бугунги кунга қадар электр станцияга барча ускуна ва материаллар келтирилиб, қуёш панеллари ўрнатилган.

Асосий трансформатор, бошқарув ва хўжалик бинолари, сув ва канализация мажмуалари, очиқ тақсимлаш ускуналари монтаж қилинган, 19 дона трансформаторлар ўрнатилиб, синов ишлари якунланди.

Жорий йил 22 август куни станциянинг илк генерация қуввати республика ягона электр энергетика тизимига уланган.