Босния ва Ҳерцеговинада президиум таркиби ўзгарди

Босния ва Ҳерцеговинанинг уч томонлама миллатлараро президиуми учун курашда босняклардан мўътадил социал-демократ Денис Бечиревич етакчилик қилмоқда. 3 октябр, душанбага ўтар кечаси эълон қилинган дастлабки натижаларга кўра, ўн бир мухолифат партияси томонидан қўллаб-қувватланган Бечиревич 55,78 фоиз овоз олган, у миллатчи Демократик ҳаракат партияси (ДҲП) етакчиси Бакира Изетбеговични 39,31 фоиз ортда қолдирди.

Изетбегович мағлубиятини тан олди. Бечировичнинг ғалабаси шуни англатадики, ўн икки йил ичида биринчи марта ДҲП сиёсатчиси жамоавий давлат раҳбари бўлган органда вакиллик қилмайди.

Дастлабки натижаларга кўра, Хорватия демократик ҳамдўстлиги партияси вакили Боряна Кришто (51,36 фоиз) хорватлар томонидан президиумда ўрин олади ва у ерда Желько Комшич ўрнига (48,64) келади.

Президиумдаги серблар ўрнини, эҳтимол, мамлакатнинг Сербия қисмида ҳукмронлик қилаётган Мустақил социал-демократлар иттифоқи (МСДИ) номзоди Желька Цвиянович (51,65 фоиз) эгаллаши мумкин. У серб айирмачиси Милорад Додикнинг яқин сафдоши ва партиядоши. Шу пайтгача у президиумдаги Сербия ўриндиғини эгаллаб келган, энди эса у Серб Республикаси президентлигига номзодини қўйган ва унинг партияси баёнотига кўра, сайловларда етакчилик қилмоқда. Бироқ Демократик тараққиёт партиясидаги миллатчиларнинг рақиблари ҳам ўз номзоди Елена Тривич ғалаба қозонганини эълон қилди. Сайловнинг расмий натижалари 3 октябрда эълон қилиниши керак.

Босния ва Ҳерцеговинадаги сайловлар кучайиб бораётган этник низолар фонида ўтди. Миллий институтлар даражасида фуқаролар президиумни, федерал парламентни, шунингдек, мамлакатнинг асосан мустақил бўлган икки қисми парламентларини, Серб Республикаси президентини ҳамда Босния ва Ҳерцеговина Федерациясининг кантонал маъмуриятларини сайладилар.