Ангренда қалбаки 100 минг сўмликларни тайёрлаб, ярим баҳосида сотганлар ушланди

Ангрен шаҳар ички ишлар бошқармаси ходимлари томонидан ўтказилган тезкор тадбирда фуқаро 1 500 000 сўм қалбаки пулларни 400 минг сўмга сотаётган вақтида қўлга олинди.

Фото: Тошкент вилояти ИИББ

Тошкент вилояти ИИББ ахборот хизмати хабарига кўра, ҳолат юзасидан ўтказилган тезкор суриштирувлар давомида, бир бирига уланиб кетган мазкур «жиноят занжири» узилиб, ишга алоқадор бўлган яна 4 нафар (29-47 ёшли) шахслар процессуал тартибда қўлга олинди.

Улардан яна қиймати 1 500 000 сўмга тенг бўлган қалбаки 100 минг сўмлик купюралар ва рангли принтер далилий ашё сифатида ҳужжатлаштирилиб олинган.

Аниқланишича, ушбу шахслар томонидан, аввалроқ ҳам 5 000 000 сўмга тенг бўлган қалбаки пул купюралари чоп этилган.

Ҳозирда ҳолат юзасидан Ўзбекистон Республикаси Жиноят кодексининг 176-моддаси, 2-қисми билан жиноят иши қўзғатилиб, тергов ҳаракатлари олиб борилмоқда.

#пул #Ангрен