Тошкентда Malibu ЙПХ ходимини судраб кетди, Tracker эса чорраҳани тартибга солаётган инспекторни уриб юборди

Тошкент шаҳар ИИББ пойтахт кўчаларида сўнгги кунларда хизмат вазифасини олиб бораётган ЙПХ ходимлари иштирокида юз берган йўл-транспорт ҳодисалари тўғрисида маълумот берди. 

Қайд этилишича, Тошкентнинг Нукус кўчасида Malibu-2 русумли транспорт воситаси ҳайдовчиси давлат рақами белгиларисиз, машинасига қўшимча жиҳозлар ўрнатиб ҳаракатланган. Транспорт воситасининг барча ойналари қорайтирилган бўлган.

ЙПХ ходими ҳайдовчига тўхташ ишорасини кўрсатган, аммо у инспекторнинг қонуний талабига бўйсунмасдан, ходимни машина капотида тахминан 1,5 километрга судраб кетган. Кўрилган чора-тадбирлар натижасида қоидабузар ҳайдовчи тўхтатилган. 

Ҳолат юзасидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, ҳайдовчига нисбатан қамоққа олиш тарзидаги эҳтиёт чораси танланган. Машина жарима майдонига жойлаштирилган. 

Шунингдек, 23 апрел куни Дўрмон йўли ва Мирзо Улуғбек кўчалари кесишмасидаги чорраҳада хизмат олиб бораётган Тошкент шаҳар ИИББ ЙҲХБ ЙПХ инспекторини Tracker уриб кетган.

Шифохонага олиб борилган инспекторга ўнг ва чап қўл кўплаб шилинмалари, чап чаноқ суягининг бир неча жойдан синиши, чап тизза соҳаси ва оёқ юмшоқ тўқималарининг лат ейиши ташхиси қўйилган.

«Тирбандликнинг олдини олиш мақсадида чорраҳага чиқиб, унинг марказида ўзимга қулай жойни танладим. Учинчи қатордан келдими ёки тўртинчи қатордан билмайман, Tracker келиб урди. Ўша ердаги ҳамкасбларим, Миллий гвардия, ҳаммаси келиб, биринчи тиббий ёрдамни кўрсатди», — дейди жабрланувчи.

Ҳозирда мазкур ҳолат юзасидан терговга қадар текширув ҳаракатлари олиб борилмоқда.