Қозоғистон инвесторлар учун янги «олтин визалар»ни жорий этмоқда

Қозоғистон Ташқи ишлар вазирлиги мамлакатнинг инвестицион жозибадорлигини мустаҳкамлаш ва узоқ муддатли бизнес ҳамкорликни қўллаб-қувватлашга қаратилган инвестиция визаларини олишнинг янги қоидаларини тасдиқлади.

Унга кўра, Қозоғистон компаниялари устав капиталига ёки маҳаллий эмиссия қимматли қоғозларига камида 300 минг доллар инвестиция киритган чет эл фуқаролари инвесторлик визасини расмийлаштириш учун электрон ариза топширишлари мумкин бўлади. Мазкур «олтин виза» 10 йил муддатгача Қозоғистонда яшаш гувоҳномасини олиш имкониятини тақдим этади.

ТИВнинг маълум қилишича, халқаро амалиётда кенг тарқалган бу каби виза дастурлари капитал, технология ва бизнес фаолликни жалб этишнинг самарали усули ҳисобланади.

«Олтин визалар» берилиши хорижий инвесторлар учун ҳуқуқий кафолатларни таъминлайди ҳамда Қозоғистоннинг инвестицион муҳитига бўлган ишончни мустаҳкамлайди. Ушбу янгилик мамлакатнинг очиқлик, капитални ҳимоя қилиш ва барқарор халқаро иқтисодий алоқаларни ривожлантиришга қаратилган стратегик йўналишини акс эттиради», — дейилади Қозоғистон Ташқи ишлар вазирлигининг баёнотида.

Ҳужжат расман эълон қилинган кундан 10 кун ўтиб кучга киради.

Аввалроқ 2025 йил 1 июндан хорижий давлатлар фуқаролари ва фуқаролиги бўлмаган шахсларга 200 минг АҚШ доллари ҳамда уларнинг ҳар бир оила аъзосига (турмуш ўртоғи, фарзанди ва ота-онаси) 100 минг АҚШ доллари миқдоридаги тўловлар эвазига Ўзбекистонда яшаш гувоҳномаси 5 йил муддатга соддалаштирилган тартибда берилиши маълум қилинган эди.