NASA 2026 йилда Марсга ракета учириши мумкин

Агар ушбу режа амалга ошадиган бўлса, бу SpaceX компанияси учун жуда фойдали бўлади, чунки парвозлар учун айнан Илон Маск компаниясининг ракеталаридан фойдаланилиши мумкин.

Фото: NASA

NASA яқин йиллар ичида Марсга ракета учириш вариантларини кўриб чиқмоқда. Бу ҳақда агентлик матбуот котиби Бетани Стивенсга таяниб, Politico хабар берди.

«Биз кейинчалик инсонларни Марсга қўндириш имконини берадиган янги технологияларни синовдан ўтказиш учун барча имкониятларни, жумладан 2026 ва 2028 йиллардаги старт ойналаридан фойдаланишни баҳолаяпмиз», — дейди Стивенс.

Қайд этишича, 2026 ва 2028 йилларда Ер ва Марс бир-бирига жуда яқин масофада яқинлашади, бу эса парвозларни амалга оширишга қулай.

NASA баёноти космосни ўрганишдаги устувор йўналишлар ўзгараётганидан далолат беради. Чунки АҚШ Конгресси аллақачон Ойни ўзлаштириш дастурини маъқуллаган ва NASA’га Ернинг табиий йўлдоши ёки унинг яқинида инсонларнинг узоқ муддат қолишини таъминлаш мажбуриятини юклаган. Шу сабабли, конгрессменлар янги харажатларни молиялаштиришга розилик беришдан воз кечишлари мумкин.

NASA’нинг одатда агентлик режаларидан хабардор бўладиган ходимлари Politico’га устувор йўналишлар ўзгаргани ҳақида маълумотга эга эмасликларини айтган.

Агар NASA’нинг янги режалари амалга ошса, бу Илон Маскнинг SpaceX компанияси учун жуда қулай вазиятни яратиши мумкин, чунки ушбу парвозлар учун айнан унинг ракеталаридан фойдаланилиши эҳтимолдан холи эмас.

Аввалроқ Tesla ва SpaceX асосчиси Илон Маск одамсифат Optimus роботига эга Starship коинот кемаси 2026 йил охирида Марсга учишини эълон қилганди. Агар парвоз муваффақиятли якунланса, одамлар Марсга 2029 йилдаёқ қўниши мумкин.

#Марс #NASA