Қирол Чарлз III Пол Маккартнидан камбағалроқ экани аниқланди

The Sunday Times Буюк Британиядаги энг бой одамларнинг йиллик рейтингини эълон қилди. Биринчи ўринни, сўнгги йилларда бўлгани каби, Ҳиндистоннинг Hinduja Group молиявий-саноат гуруҳи эгаси Гопи Ҳиндужа ва унинг оиласи (35,3 миллиард фунт стерлинг) эгаллади.

Иккинчи ўринда Reuben Brothers асосчилари, ака-ука Дэвид ва Саймон Рубен (26,9 миллиард фунт стерлинг) ва учинчи ўринда Warner Music Group (25,7 миллиард фунт) эгаси, молиячи Леонард Блаватник жойлашди. Уларнинг барчаси бир йил аввал ҳам кучли учликка кирган эди.

350 нафар энг бой британияликларнинг умумий бойлиги йил давомида 3 фоизга камайиб, 772,8 миллиард фунт стерлингни ташкил қилди. Рейтингдаги миллиардерлар сони ҳам камайди, 165 нафардан 156 нафарга. Бу кетма-кет учинчи йил пасайишдир.

Қирол Чарлз III рейтингда 238-ўринни эгаллади (640 миллион фунт). Буюк Британиянинг собиқ бош вазири Риши Сунак ва унинг рафиқаси Акшата Мерти ҳам 238-ўринда.

Рўйхатга бир қанча мусиқачилар кирди, жумладан, Пол Маккартни ва унинг рафиқаси Ненси (151-ўрин; £1 миллиард), Элтон Жон (283-ўрин; 475 миллион фунт), Мик Жаггер ва Кейт Ричардс (иккаласи ҳам 440 миллион фунт стерлинг бойлиги билан 295-ўринда) ва Эд Ширан (330 миллион фунт стерлинг).

Шунингдек, 350 нафар энг бой британияликлар қаторидан ёзувчи Жоан Роулинг (168-ўрин; 945 миллион фунт стерлинг), собиқ футболчи Дэвид Бэкхем ва унинг рафиқаси, қўшиқчи ва модель Виктория Бэкхем (273-ўрин; 500 миллион фунт) ва режиссёр Кристофер Нолан ва унинг рафиқаси Дам Эмма Томас (340-ўрин; 340 миллион фунт стерлинг) ҳам бор.

The Sunday Times Rich List рейтингни 1989 йилдан бери чоп этилади. Рейтингни тузишда нафақат Британия фуқаролари, балки «Буюк Британияда яшаб, ишлаётганлар» ҳамда «Британия фуқароси билан турмуш қурганлар, Буюк Британия билан мустаҳкам алоқага эга бўлганлар, бу ердаги мулк ёки бошқа активларга эга бўлганлар, Британия сиёсий партиялари, институтлари ёки хайрия ташкилотларини қўллаб-қувватлаганлар» ҳам ҳисобга олинади.