Ўзбекистон элчиси Андорра князи-ҳамраисига ишонч ёрлиқларини топширди

Ўзбекистоннинг Андоррага янги тайинланган элчиси (қароргоҳи Мадрид шаҳрида жойлашган) Фаррух Турсунов Андорра князи-ҳамраиси, Урхелск епископи Жоан Энрик Вивес-и-Сисилга ишонч ёрлиқларини топширди.

Қайд этилишича, тантанали маросимдан сўнг бўлиб ўтган суҳбат чоғида Урхелск епископи элчини самимий қутлаб, Ўзбекистонда кечаётган ўзгаришлар жараёнларини катта қизиқиш билан кузатиб боришини таъкидлаган.

Андорра ҳамраиси Ўзбекистон миллатлараро ва конфессиялараро тотувликнинг муваффақиятли намуналарини кўрсатаётгани, 130 дан ортиқ миллат ва элатлар, шунингдек, 2000 дан ортиқ диний ташкилотлар тинч ва ўзаро ҳурмат муҳитида истиқомат қилаётганини эътироф этган.

Учрашувда Андорра кичик бўлишига қарамай, Ўзбекистон билан муносабатларни ривожлантиришга катта аҳамият бераётгани, уни муҳим ва ҳурматли ҳамкор сифатида қабул қилиши алоҳида қайд этилган. Ўзбекистоннинг сайёҳлик салоҳияти, хусусан Самарқанд шаҳрининг буюк тарихи ва маданий меросига эътибор қаратилган.

Бундан ташқари, Андорра ҳамраиси Ўзбекистонга ташриф буюриш истагини билдирган ва андорралик ёшларнинг бой тарих ва маданиятга эга мамлакатларга қизиқиши ортиб бораётгани, Ўзбекистон эса бундай йўналишлар орасида алоҳида ўрин тутаётганини таъкидлаган.

Фаррух Турсунов Ўзбекистоннинг Испаниядаги фавқулодда ва мухтор элчиси сифатида 2023 йил 7 декабрь куни Мадрид шаҳрига ташриф буюрган эди. Дипломат 2024 йилнинг апрель ойида Ўзбекистон элчиси сифатида Испания қироли Филипп VI га ишонч ёрлиқларини топширган.

Шунингдек, Фаррух Турсунов мамлакатимизнинг БМТ Туризм ташкилотидаги (аввалги Бутунжаҳон туризм ташкилоти) доимий вакили ҳисобланади. Бундан ташқари, элчи Фаррух Турсунов шу йил март ойида Андорра ҳамраиси, Франция президенти Эммануэл Макронга ишонч ёрлиқларини топширган эди.