Путин урушдан қандай чиқишни билмайди – Вэнс

Оқ уй Украинадаги можарони ҳал қилиш жараёни боши берк кўчага кириб қолди, деб ҳисоблайди. Бу ҳақда АҚШ вице-президенти Жеймс Вэнс Sky News телеканалига берган интервьюсида маълум қилди.

Унинг сўзларига кўра, Россия президенти Владимир Путин «урушдан қандай чиқишни билмайди». Шунинг учун ҳам АҚШ президенти у билан 19 май куни телефон орқали гаплашмоқчи.

«Вазият маълум даражада боши берк кўчада эканини тушунамиз. Трамп президент Путинга «Ниятинг жиддийми?» демоқчи», деди Вэнс.

Унинг фикрича, агар Россия мулоқотга тайёр бўлмаса, «охир-оқибат АҚШ бу бизнинг урушимиз эмаслигини айтиши керак».

Аввалроқ, Кремлга яқин манбалар Bloomberg агентлигига Путин урушни тугатишдан манфаатдор эмаслигини ва йил охирига қадар Украинаинг тўртта ҳудуди – Донецк, Луганск, Запорожие ва Херсонни тўлиқ қўлга киритмоқчи эканини айтди. Уларнинг сўзларига кўра, Путин Қўшма Штатлар томонидан янги санкциялар қўлланилиши эҳтимолидан қўрқмайди, шу боис Трамп келишув масаласида жиддий ён босишга эришмайди. Айни пайтда, Киев Трамп ва Путин ўз тинчлик режасини келишиб, Украинага Америка қурол-яроғ таъминотини тўхтатиш таҳдиди остида уни барча шартларга кўндирмоқчи бўлишидан қўрқмоқда, деб ёзди CNN. Телеканалнинг ёзишича, айнан шу сабабли ҳозирда АҚШ президентининг эътиборини тортиш учун кураш кетмоқда.