Трамп Путин билан мулоқотдан кейин Россия ва Украина «зудлик билан» музокаралар бошлашини маълум қилди

Россия ва Украина «зудлик билан» ўт очишни тўхтатиш ва урушни якунлаш бўйича музокаралар бошлайди. Бу ҳақда АҚШ президенти Доналд Трамп Владимир Путин билан бўлиб ўтган телефон мулоқотидан кейин маълум қилди.

«Ҳозиргина Россия президенти Владимир Путин билан икки соатлик телефон мулоқотим якунланди. Ўйлашимча, у яхши кечди. Россия ва Украина зудлик билан ўт очишни тўхтатиш ва муҳими, урушни якунлаш бўйича музокараларни бошлайди», — деб ёзади Трамп ўзининг Truth Social ижтимоий тармоғига.

Унинг таъкидлашича, бўлажак келишув шартлари бевосита Москва ва Киев томонидан ишлаб чиқилади, чунки «музокаралар жараёнининг бошқа ҳеч кимга маълум бўлмаган тафсилотларини фақат улар билади». Трампнинг сўзларига кўра, у Путин билан конструктив муҳитда суҳбатлашган. «Суҳбат оҳанги ва руҳи аъло даражада эди. Агар бу бошқача бўлганида, мен буни кейин эмас, айнан ҳозир айтган бўлардим», — дея қўшимча қилади у.

Бундан ташқари, АҚШ президенти Путин уруш тугаганидан кейин Қўшма Штатлар билан кенг кўламли савдо ҳамкорлигига тайёр эканини билдирганини қайд этди. «Россия бу фожиали «қонли ҳаммом» якунланганидан кейин Қўшма Штатлар билан кенг қамровли савдо муносабатларини йўлга қўймоқчи. Мен бу ғояни қўллаб-қувватлайман», — дейди Трамп.

Трампнинг фикрича, Россияда улкан иқтисодий салоҳият мавжуд, у янги иш ўринларини яратиш ва ҳаёт даражасини ошириш имконини беради. «Бу салоҳият — деярли чексиз», — дейди у. Шу билан бирга, Трампнинг қўшимча қилишича, урушдан кейинги тикланиш жараёнида Украина ҳам келажакдаги савдо алоқаларининг асосий манфаатдорлардан бирига айланиши мумкин.

«Россия ва Украина ўртасидаги музокаралар зудлик билан бошланади — бу ҳақда мен Украина президенти Володимир Зеленский, Еврокомиссия президенти Урсула фон дер Ляйен, Франция президенти Эммануэл Макрон, Италия бош вазири Жоржа Мелони, Германия канцлери Фридрих Мерц ва Финляндия президенти Александр Стуббга Владимир Путин билан суҳбатдан сўнг дарҳол телефон орқали маълум қилдим. Ватикан эса Рим папаси орқали бу музокараларни ўз ҳудудида ўтказишга алоҳида қизиқиш билдирмоқда», — дея таъкидлайди АҚШ президенти.

Путин ҳам АҚШ президенти билан бўлиб ўтган мулоқотни юқори баҳолади. Россия президентининг сўзларига кўра, у Трампга Россия Украинага «бўлажак тинчлик сулҳининг меморандум» устида биргаликда ишлаш таклифини беришга тайёрлигини маълум қилган. «Мен суҳбатни юқори баҳолайман. Асосий масала — ҳар икки томон тинчликка интилишда максимал даражада ҳаракат қилиши ва барча томонларни қониқтирадиган муросаларни топишидир. Умуман олганда, Россиянинг позицияси аниқ: биз учун энг муҳими — инқироз сабабларини бартараф этишдир», — деди Путин мулоқотдан кейин.