Россия меморандумни имзолаш учун Зеленскийни четлатишни талаб қилмоқда

Украинада ўт очишни тўхтатиш бўйича меморандумни имзолаш учун бу мамлакат халқи янги президентни сайлаши керак, дея маълум қилди Россия Ташқи ишлар вазирлиги. Украина президенти Володимир Зеленский қонунийлигини йўқотди ва шу сабабли халқаро ҳужжатларни имзолай олмайди, деди Россия ТИВ юридик департаменти директори Максим Мусихин 22 май, пайшанба куни ТАСС агентлигига берган интервьюсида.

Меморандум «халқ мандатига эга бўлган шахс» томонидан имзоланиши керак, чунки «акс ҳолда муаммолар бўлади», деди у. Мусихин шунингдек, Олий рада спикери халқаро ҳужжатларни имзолаш ваколатига ҳам эга бўлиши мумкинлигини айтди.

Россия президенти Владимир Путин қўшни давлатда янги президентлик сайловлари ўтказилишини бир неча бор талаб қилган. Март ойи охирида у Украинада сайловлар ўтказиш учун БМТ ва бир қатор давлатлар шафелигида «вақтинчалик бошқарув»ни жорий этишни муҳокама қилишни, кейин эса «бутун дунёда тан олинадиган ва ишончли бўладиган қонуний ҳужжатлар»ни имзолашни таклиф қилди.

Аввалроқ Путин Зеленскийни «собиқ давлат раҳбари» деб атаган ва Зеленский билан тинчлик шартномасини тузишдан бош тортишини маълум қилган, чунки у «ноқонунийлиги туфайли ҳеч нарсани имзолашга ҳақли эмас». Бу позиция, жумладан, Украина Ташқи ишлар вазирлиги раҳбари Андрей Сибига томонидан танқид қилинди: «Украина президентининг қонунийлиги ҳақидаги изоҳлар бемаънилик. Кремлда чорак асрлик бошқарув давомида Украинада учта президент адолатли сайловлар шароитида ўзгарди».