Ветнам ҳукумати Telegramʼни блоклашга қарор қилди

Ветнам ҳукумати алоқа операторларидан мамлакат ҳудудида Telegramʼни блоклашни талаб қилди. Бунга мессенжер ҳукуматга жиноий ишлар доирасида фойдаланувчиларнинг маълумотларини тақдим этишдан бош тортгани сабаб бўлган, деб хабар беради Reuters.

Ветнам Технологиялар вазирлигининг фармойишига мувофиқ, телекоммуникация компаниялари 2 июнга қадар Telegramʼни блоклаш бўйича кўрилган чора-тадбирлар тўғрисида ҳисобот бериши керак.

Шунингдек, ушбу ҳужжатда Ветнам полицияси томонидан тақдим этилган маълумотлар ҳам келтирилган бўлиб, унга кўра, мамлакатдаги 9,6 мингта Telegram-каналнинг 68 фоизи ноқонуний фаолият, жумладан, фирибгарлик, гиёҳванд моддалар савдоси ва «терроризм билан боғлиқ» ишлар билан шуғулланиши аниқланган.

Технологиялар вазирлиги вакили Reutersʼга ҳужжатнинг ҳақиқий эканини тасдиқлаб, блоклаш тўғрисидаги қарор Telegram ҳукуматга жиноий ишлар бўйича ўтказилаётган терговлар доирасида фойдаланувчиларга тегишли маълумотларни тақдим этишдан бош тортгани сабаб қабул қилинган.

Мессенжернинг ўзи ҳозирча ҳолатга изоҳ бермади.

Таъкидланишича, Ветнам Коммунистик партияси ОАВда қаттиқ цензурани қўллаб-қувватлайди ва бир неча бор Мета, Google, TikTok каби йирик компанияларга мурожаат қилиб, тажовузкор, ёлғон ва ҳукуматга қарши контентни ўз ичига олган «зарарли» материалларни йўқ қилиш бўйича саъй-ҳаракатларни мувофиқлаштиришни талаб қилган.

2024 йил августда Telegram асосчиси Павел Дуров Францияда ҳибсга олинган эди. У уюшган жиноятчиликка боғлиқ қатор жиноятлар, жумладан, наркотик моддалар ва болалар порнографиясини тарқатишга алоқадорликда, шунингдек, ҳукумат сўровлари бўйича маълумот тақдим этишдан бош тортганликда айбланган эди.