Трампнинг Путинга нисбатан риторикаси ўзгарди. Охирги суҳбатдан кейин

Сарлавҳани кўриб яна Трамп ҳақидами, деб койиманг. Ишонинг, АҚШ президенти яна аввалги – ҳар бир твити хабар қилинадиган формасига қайтиб олди. Биринчи муддатида ахборот олами учун энг машҳур тармоқ – Твиттер'ни «портлатарди», энди журналистлар Трампни ўқиш учунгина кирадиган Truth орқали кимгадир нафратини сочиб, кимгадир таҳдид қилмоқда.

{Yii::t(}

Ўтказиб юбориш 6s

Ўтказиб юбориш

Республикачи иккинчи муддати бошида айтган гапларини эшитган конспирологик уйдирма мухлислари «Трамп чиндан КГБ агенти экан», деган фитна назариясига чин дилдан ишона бошлаганди. Бироқ мистер Трамп охирги икки-уч кунда сиёсат ҳақида суҳбат бошланганда даврани ҳеч кимга бермайдиган бу товариш сафсатабозлар ривоятини расво қилди.

Трамп: «Путин олов билан ўйнашяпти»

АҚШ президенти Трамп Россия навбатдаги марта Украинани бомбалаганини қораларкан «Путин ақлдан озганини» айтганди. Бу ҳали ҳаммаси эмаскан, охирги телефон суҳбатидан кейин Путинга нисбатан риторикаси ўзгарган Трамп энди Путин «олов билан ўйнашаётганини» айтиб чиқди. 28 феврал куни Трамп худди шу иддаони президент Зеленскийга нисбатан ишлатганди.

«Мен бўлмасам, Россия билан ЖУДА ЁМОН ишлар содир бўларди. Владимир Путин буни тушунмай олов билан ўйнашяпти», деб ёзди Трамп Truth ижтимоий тармоғидаги саҳифасида. АҚШ президенти бу гал ЖУДА ЁМОН сўзини катта ҳарфларда ёзди. У одатда ўз постларида қайсидир сўзга урғу беришни истаса, уни capslock'да ёзади. Трамп бу гал Путинга эътирози сабабини ёзмади. Афтидан, бу АҚШ президенти олдинроқ Путин ҳақида ёзган постининг мантиқий давоми бўлса керак.

Медведев «ишга киришди»

Дмитрий Медведев деган одам эсингизда бўлса керак. Унутганлар учун эслатаман: 2008 йилдан 2012 йилгача бош вазир Путиннинг соясида 4 йил Россия президенти лавозимида ишлаган собиқ «Газпром» хўжайини. Ҳозир Медведев фаол тарзда Telegram-канал юритади. У Трампнинг Путин ҳақида айтган гапларига муносабат билдирди. «Мен фақат битта чинакам ёмон нарсани биламан: Учинчи жаҳон уруши. Умид қиламан, Трамп буни тушунади», деб ёзди Медведев.

Россия собиқ президентига Трамп маъмуриятида президентнинг Россия бўйича вакили даражасида жавоб беришди. «Учинчи жаҳон уруши билан қўрқитиш катта давлатга хос бўлмаган, ўхшамаган изоҳ бўлди. Президент Трамп урушни тугатишга интилмоқда. Биз бир ҳафта олдин ваъда қилганингиз меморандумни кутяпмиз. Ўт очишни тезда тўхтатинг», деб ёзди Трампнинг махсус вакили Кит Келлог Медведевга жавобан.

Кейинчалик FOX News'га интервю берган генерал Келлог Киев урушни тугатиш бўйича версияси қайд этилган меморандум лойиҳасини аллақачон топширгани, энди Россия меморандум тақдим этиши кутилаётганини айтди.

«Путин «олтин кўприк»ни ёқмоқда»

Оқ уйда Трампнинг Путин ҳақида гаплари АҚШнинг Россиядан хафсаласи пир бўлганини билдирмаслиги ҳақида баёнот беришганди. Лекин, афтидан, нафақат Трампнинг, балки АҚШ юқори раҳбариятининг Россияга нисбатан позиция ўзгарган. Politico нашри билан суҳбатлашган Оқ уйдаги юқори мартабали мулозимларнинг айтишича, Трампнинг тоқати тоқ бўлмоқда.

«Путин Трамп унга таклиф қилган «олтин кўприк»ни ёқиб юборишга жуда яқин турибди», деган Оқ уйдаги мулозимлардан бири, хусусан. Унинг айтишича, Трамп Путинга урушдан кейин Россия ва АҚШ муносабатларини тиклашни таклиф қилган, Путин эса бунга жавобан Украинага ҳужум қилишни давом эттирган.

Wall Street Journal'нинг ёзишича, Трамп шу ҳафтанинг ўзида Россияга қарши янги санкциялар эълон қилиши мумкин. Бироқ ҳали бу борада якуний қарор қабул қилинмаган. Биз воқеалар ривожини кузатиб борамиз. Энг муҳим воқеалардан бехабар қолмаслик учун Kun.uz'нинг ижтимоий тармоқлардаги саҳифаларига обуна бўлинг.

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов