Зеленский: TAURUS'ни Украинага етказиб бериш Мерц билан муҳокама қилинди

Украина президенти Володимир Зеленский Берлинга ташрифи чоғида Германия канцлери Фридрих Мерц билан бошқа масалалар қатори Германиянинг TAURUS қанотли ракеталарини ўз мамлакатига етказиб бериш имкониятларини муҳокама қилди. Украина президенти бу ҳақда 28 май, чоршанба куни кечқурун RTL телеканалига берган интервюсида гапириб, бу мавзу бўйича тафсилотлар ошкор этилмаслигини таъкидлади, чунки иккала сиёсатчи ҳам «айрим мавзулар бўйича» очиқ гапирмасликка келишиб олган.

«Айрим мавзулар борки, улар ҳақида очиқ гапирмасликка келишиб олдик. Биз канцлер билан TAURUS масаласини икки суҳбатда муҳокама қилдик. Биз бу йўналишда ишлаяпмиз. Лекин мен сизга батафсил маълумот бера олмайман. Бу ҳақда канцлерга ваъда берганман ва сўзимда тураман», — деди Зеленский бошловчининг бу борадаги саволига жавоб берар экан. Шунингдек, у Мерц билан муносабатларида ўзаро тушуниш борлиги ҳақидаги баёнотга қўшилди.

Зеленскийнинг сўзларига кўра, бу қанотли ракеталар фақат «Украина фойдаланиши мумкин бўлган воситалардан бири, аммо TAURUS'нинг ўзи ҳеч қайси давлатни Россиядан ҳимоя қила олмайди». «Биласизми, ростини айтсам, TAURUS Россияни тўхтатишнинг ягона йўли эмас. Бу етарли эмас. Бизга TAURUS, Patriot керак. Бизга буни ривожлантириш керак. Бизга сиёсий босим керак. Бизга кучли санкциялар пакетлари керак. Бизга Европа ва Америка ўртасида бирлик керак. Агар биз Украинани кучайтирмасак, буни қилмасак, Россия ҳужумининг аҳамиятини ошириши мумкин», деди Зеленский интервюда. Шунингдек, у Украина ва Германия ўртасидаги мудофаа соҳасидаги ҳамкорликни мустаҳкамлаш муҳимлигини таъкидлади.