Киев Трампни Россияни оташкесимга мажбурлаш учун санкциялардан фойдаланишга чақирди

Украина президенти Володимир Зеленский Америка етакчиси Доналд Трампни Москва бу талабни бажаришдан сўнгги бош тортганидан сўнг Россияни тўлиқ ўт очишни тўхтатишга «ундаш» учун унга қарши янги қаттиқ санкцияларни тасдиқлашга чақирди. «Улар буни ҳозирча бошқача тушунмаяпти. Ва биз буни адолатли деб ҳисоблаймиз», деди Зеленский 2 июн, душанба куни Украина ва Россия делегацияларининг Истанбулдаги учрашувидан сўнг журналистлар саволларига жавоб берар экан.

Унинг эслатишича, тўрт ойдан кўпроқ вақт олдин «Америка Қўшма Штатлари ўт очишни тўлиқ тўхтатиш ҳақида ўз ишорасини берган» ва Киев уларни қўллаб-қувватлаган. Зеленский янги санкциялар пакети тез орада АҚШ Сенати томонидан маъқулланишига умид билдирди.

Украина президенти офиси раҳбари Андрей Ермак ҳам Украинанинг ҳамкорларига Россия Федерациясига қарши санкцияларни кучайтириш бўйича мурожаат қилди. «Руслар ўт очишни тўхтатмаслик ва урушни давом эттириш учун ҳамма нарсани қилмоқда. Янги санкциялар ҳозир жуда муҳим. Рационаллик - Россияга тегишли эмас», — деб ёзди у Истанбулдаги музокаралар якунланганидан кейин Telegramʼда.

Украина ва Россия делегацияларининг Туркияда бир соатдан ортиқ давом этган учрашуви чоғида томонлар янги ҳарбий асирлар алмашиш бўйича келишиб олди, бунда 1000-1200 киши ўз мамлакатларига қайтиши мумкин. Украина делегацияси россияликларга Украина ҳудудидан мажбуран кўчирилган, Киевга қайтишга интилаётган юзлаб болалар рўйхатини топширди. «Украиналик болаларнинг қайтиши адолатли ва мустаҳкам тинчликнинг ажралмас қисми ва ишончнинг асосий элементи, ниятлар самимийлигининг биринчи синовидир. Биз жавоб кутмоқдамиз. Тўп Россия томонида», — деди Ермак.