ЕИ ва АҚШ Россияга қарши янги санкцияларни муҳокама қилди

Европа Комиссияси (ЕК) раиси Урсула фон дер Ляйен Берлинда америкалик сенатор Линдси Грэм билан Россияга қарши санкцияларни янада кучайтириш масаласини муҳокама қилди. Брюсселдаги идора раҳбари «тез орада» у «санкциялар ва бу масала бўйича АҚШ билан ҳамкорликда келишилган нарса» ҳақида хабар беришига умид қилмоқда, деди 2 июн, душанба куни журналистларга ЕК вакили.

Фон дер Ляйеннинг ўзи X ижтимоий тармоғида Грэм билан «яхши мунозара» ҳақида ёзди ва ҳозирда Европа Иттифоқи тўрт йилдан бери Украинага қарши кенг кўламли уруш олиб бораётган Россияга қарши 18-санкциялар пакетини тайёрлаётганини таъкидлади. Унинг сўзларига кўра, бу «қаттиқ санкциялар, жумладан, Россия хом нефтининг максимал нархини пасайтириш»ни назарда тутади. Бундан ташқари, «Шимолий оқим» газ қувури инфратузилмаси ва Россия банк секторига оид чора-тадбирлар муҳокама қилинмоқда.

«Агар бу қадамлар АҚШ чоралари билан биргаликда амалга оширилса, бу бизнинг санкцияларимизнинг умумий таъсирини кескин оширади», — дея қўшимча қилди у. Фон дер Ляйен «Россияга босим ишлаяпти, чунки Кремл бошқа ҳеч нарсани тушунмайди», деб таъкидлади. Унинг сўзларига кўра, Грэм келаси ҳафта янги санкциялар тўғрисидаги қонун лойиҳасини Сенатга тақдим этиш ниятида. ЕИнинг аввалги санкциялар пакети май ойида киритилган ва бошқа нарсалар қатори Россиянинг «соядаги» флотига қарши чораларни ҳам ўз ичига олган эди.

Ўз навбатида, Германия ташқи ишлар вазири Йоханн Вадефул Грэм билан учрашувдан сўнг АҚШ ва Европа Россия президенти Владимир Путинга нисбатан сиёсатда умумий йўналишни давом эттираётганини таъкидлади. У америкалик сенатор билан Кремлга босим ўтказишда давом этиш зарурлиги тўғрисида келишиб олди. «Путин ниҳоят зудлик билан ва сўзсиз ўт очишни тўхтатишга рози бўлиши ва музокаралар столига ўтириши керак», — дея қўшимча қилди немис вазири.