Зеленский Украина қуролли кучлари қўмондонлигида ўзгаришлар амалга оширди

Украина президенти Володимир Зеленский 3 июн куни кечқурун олий ҳарбий қўмондонликда бир қанча ўзгаришлар бўлганини маълум қилди. Хусусан, сўнгги вақтларда қуруқликдаги қўшинларга қўмондонлик қилган Михайло Драпатий Украина қуролли кучлари Бирлашган кучлари қўмондони этиб тайинланди. Бу Бош штабга бўйсунадиган ва йирик операцияларни ўтказишда қўшинларнинг турли гуруҳлари ўртасидаги мувофиқлаштириш учун масъул бўлган ҳарбий бошқарув органидир.

Драпатий бир неча кун олдин қуруқликдаги қўшинлар бош қўмондони лавозимидан истеъфога чиққанди – бу россиялик ҳарбийлар ўқув бўлинмаларидан бирига ракета ҳужуми уюштиргани, натижада 12 нафар ҳарбий ҳалок бўлиб, 60 дан ортиқ киши жароҳатлангани ортидан рўй берганди. «Агар биз шараф сўзи эмас, иши бўлган армия қурмасак, бу урушда ғалаба қозона олмаймиз. Жавобгарлик жазо эмас, ишончнинг асоси бўлган жойда. Ҳар бир командир ҳар куни – буйруқ учун, қарор учун, инсон учун жавоб берадиган жойда», – деганди у.

3 июн куни Драпатий фейсбукда Зеленский билан гаплашганини ва унга истеъфога чиқиш қарори сабабларини тушунтирганини, бунга жавобан Украина президенти унга «асосий нарсага – урушга, фронтга, ғалабага эътибор қаратиш»ни таклиф қилганини ёзди. «Президентдан топшириқ олдим. Мен сафда қоламан. Олдинги сафда. Бўлишим керак бўлган жойда. Қўлимдан келганча», – деди генерал.

Зеленский Драпатийнинг Бирлашган кучлар раҳбари этиб тайинланишини изоҳлар экан, бу «фронт билан 100 фоиз шуғуллана олиши» учун қилинганини айтди.

Бир вақтнинг ўзида Зеленский Украина қуролли кучларининг пилотсиз тизимлари ва Десант-штурм қўшинлари қўмондонларини алмаштирди.

Учувчисиз тизимлар кучлари бир йил олдин ташкил этилган – Украинада дронларга ихтисослашган қўшин тури «дунё тарихида биринчи марта» пайдо бўлгани айтилганди. Унинг янги раҳбари этиб Зеленский Россиянинг Украинага кенг кўламли босқини бошида ҳудудий мудофаа кучлари сафига кирган ва кейинчалик махсус аэроразведка бўлинмасини яратган, Украина қуролли кучларида биринчи бўлиб разведка ва ҳужум операциялари учун дронлардан фойдаланишга ихтисослашган 49 ёшли собиқ тадбиркор Роберт «Мадяр» Бровди тайинланди.

Учувчисиз тизимлар кучларининг собиқ қўмондони (у ушбу қўшин турини ташкил этилганидан бери бошқарган) Вадим Сухаревский «Шарқ» оператив қўмондонлиги қўмондони ўринбосари этиб тайинланди. Сухаревский ишдан бўшатилишига изоҳ берар экан, учувчисиз тизимлар кучларини янада ривожлантириш бўйича қарашлари раҳбариятникидан фарқ қилишини айтди.

Полковник Олег Апостол Десант-штурм қўшинларининг янги раҳбари бўлди, у илгари 95-алоҳида десант-штурм бригадасини бошқарган. Бу бўлинма Украина қуролли кучларининг Курск областидаги операциясида иштирок этганди.