Словакия депутатлар Россияга қарши санкциялар учун овоз бермасликка чақирди

Словакия парламенти (Миллий кенгаш) ҳукумат аъзоларини Россияга қарши янги санкциялар ва савдо чекловларини қабул қилиш учун халқаро ташкилотларда овоз бермасликка чақирувчи резолюцияни маъқуллади. Бу ҳақда 5 июн, пайшанба куни Reuters ахборот агентлиги ва Словакиянинг SME кундалик газетаси хабар берди.

Унга кўра, ҳужжатни қабул қилиш учун 150 нафар депутатдан 51 нафари овоз берган. Reuters агентлигининг таъкидлашича, парламент мажлисида кўплаб қонун чиқарувчилар иштирок этмаган. Мухолифат сўнгги дақиқада мажлис залини тарк этишга қарор қилди.

Қонун лойиҳаси ўта миллатчи консерватив Словакия миллий партияси депутатлари томонидан кўриб чиқиш учун тақдим этилган. Матнни Словакия бош вазири Роберт Фицо бошчилигидаги «Йўналиш – социал-демократия» партиясининг кўпчилик қонун чиқарувчилари ҳам қўллаб-қувватлади, деб ёзади Reuters. Шу билан бирга, иккинчи йирик ҳукмрон «Овоз» партиясидан бор-йўғи уч депутат уларга қўшилди.

Қарор «ҳукумат аъзоларини... Россия Федерациясига қарши янги санкциялар ва савдо чекловларини қабул қилиш учун овоз бермасликка мажбур қилади», дейилади парламент сайтидаги ҳужжат матнида. Бироқ, бу вазирлар чекловларни тўсиб қўйиши ёки уларга қарши овоз бериши кераклигини билдирмайди, дея аниқлик киритади Reuters.

Dennikn.sk онлайн газетаси ҳуқуқшуносга таяниб, ўз навбатида, резолюция мажбурий эмаслигини маълум қилди.