Қирғизистоннинг собиқ президенти Атамбаев Халқаро судда жавоб беришга тайёрлигини билдирди

Қирғизистоннинг собиқ президенти Алмазбек Атамбоев ўзига қўйилган айбловлар бўйича халқаро суд олдида маҳкамага тортилишига тайёрлигини билдирди.

«Президент Садир Жапаров гўё муваққат ҳукумат Бакиев иши бўйича очиқ суд жараёнидан қўрқишини айтди. У мени коррупциядан тортиб қотилликкача бўлган бошқа кўплаб жиноятларда ҳам айблади. Шунинг учун мен расмийларга аниқ қадам таклиф қиламан: Рим статутини ратификация қилинг ва Бош прокуратурага Халқаро судга мурожаат қилиш бўйича топшириқ беринг. Мен судда шахсан қатнашиб, барча айбловларга жавоб беришга тайёрман», деб ёзди у ижтимоий тармоқдаги саҳифасида.

Атамбаев ҳукуматга Қўй-Тош воқеаларининг барча иштирокчиларини озод қилишни таклиф этди, чунки унинг фикрича, бу иш уйдирма.

«Мамлакат раҳбариятига мурожаат қиламан: бунчалик пасткашлик қилманг, бунчалик майда-чуйда бўлманг - қамоқхоналарда ва шартли равишда ноқонуний равишда ушлаб турилган барча бегуноҳ одамларни, аслида Қўй-Тош иши ва бошқа уйдирма жиноят ишлари бўйича «гаровга олинганларни» озод қилинг. Бу одамлар фақат ўз ҳуқуқини ҳимоя қилгани ва адолатли Қирғизистонни орзу қилгани учун жазоланмоқда. Уларнинг бундан кейин ҳам қамоқда сақланиши - давлат ва ҳукумат учун, мамлакат раҳбари учун шармандаликдир. Агар ҳукумат адолат истаётган бўлса, халқаро трибуналдан қўрқмайди. Агар Ҳаага мени айбдор деб топса, ҳар қандай муддатни панжара ортида ўтказишга тайёрман», деди Атамбаев.

3 июнь куни Бишкекнинг Первомайский туман суди мамлакатнинг собиқ президенти Алмазбек Атамбаевни мол-мулкини мусодара қилиш билан бирга сиртдан 11 йилу 6 ойга озодликдан маҳрум қилди. Шунингдек, президент маъмуриятининг собиқ раҳбари Фарид Ниёзов ва парламентнинг собиқ депутати Равшан Жеэнбеков 7 йилу 8 ойга озодликдан маҳрум этилди ва суд залида ҳибсга олинди.

2019 йилнинг 7 август куни Бишкек яқинидаги Қўй-Тош қишлоғида Қирғизистон Миллий хавфсизлик давлат қўмитасининг (ГКНБ) «Альфа» гуруҳининг махсус бўлинмалари Атамбаевни куч билан ҳибсга олишга уринди ва бу собиқ давлат раҳбари тарафдорлари билан қуролли тўқнашувга айланди. Махсус кучларнинг бир аскари ўқ еб ҳалок бўлди. «Альфа»нинг олти нафар жангчиси қўлга олинди ва эртаси куни қўйиб юборилди. 2019 йил 8 августида махсус кучлар собиқ давлат раҳбарини яна ҳибсга олишга уринган пайтда тўқнашувлар давом этди. Шундан сўнг Атамбаев Қирғизистон ҳуқуқ-тартибот идоралари ходимларига таслим бўлди ва ҳибсга олинди. 7-8 август воқеалари чоғида 225 киши, жумладан, Ички ишлар вазирлигининг 91 нафар, Миллий хавфсизлик давлат қўмитасининг 40 нафар ходими жароҳатланди.