Мундиал умиди: кўпларни йиғлатган орзу ҳақида

Ўзбекистон миллий жамоаси ниҳоят футбол бўйича жаҳон чемпионатига чиқди. Қуйида мундиал йўлланмаси ўзбек футболи учун қанчалик муҳим экани, бу йўлланма футболимиз тарихидаги барча футболчиларнинг умумий ғалабаси экани ҳақида ўз фикримни билдирмоқчиман.

{Yii::t(}

Ўтказиб юбориш 6s

Ўтказиб юбориш

Калака қилинган футболимиз...

Биз футбол журналистикасидан чиққан йигитлармиз. Биз учун футбол ўзгача нарса. Аввалги видеолардан бирида айтганимдек – ҳаётнинг ёруғ томони. Бошқа авлод вакилларига ҳурмат сақлаган ҳолда айтмоқчиман: бу йўлланма баҳрайнлик Маҳмуд Абдулраҳмон йиғлатган бизнинг авлод учун айниқса жуда қадрли. Ахир биз «Футболингни қўй, бокс зўр», дейдиган ур-йиқит тарафдорлари билан озмунча талашдикми.

Ҳеч эсимдан чиқмайди, 2011 йилги Осиё кубоги вақтида қишлоқда доимгидек «свет» ўчанди. Биз радиода спорт каналини ёқдик-да, уни қўлимизга олиб бутун қишлоқ йиғилиб ўйинни кўраётган жойга қараб югурдик. Йўлда Ўзбекистон мадҳияси бошланиб қолди. Йўлма-йўл югуриб мадҳия айтганимизни кўрган одамлар кулганди. Ўша куни Австралияга 0:6 ҳисобида ютқаздик...

Мактаб давримиз футболимиз калака қилинишини кўриш билан ўтди. Ахир чиндан доим катта ўйин вақтида нимадир бўлиб мағлуб бўлардик. Миллий жамоамиз сафида хорижликларга паспорт бериб ўйнатишганидек шармандаликларни ҳам кўрдик. Элдор бошчилик жамоамиз миллионлаб мухлисларни мана шундай хўрликлардан қутқаришди, энди бизнинг кўкрагимизга ҳам шамол тегди.

Бу ҳамманинг ғалабаси

Ўзбекистон мундиалга чиқишида саралаш босқичида қатнашган барчанинг хизмати катта бўлди. Шахсан мен бу йўлда энг катта ишни Сречко Катанец қилди деб ҳисоблайман. У жамоага характер олиб кирди, одатда охирги дақиқаларда гол қўйиб юборадиган Ўзбекистон энди охирги дақиқаларда гол урадиган бўлди. Кападзе ҳам қийин паллада тизгинни қўлдан чиқармади. Элдорнинг етакчилиги, Аббоснинг сермаҳсуллиги, Алижоновнинг рейдлари Отабек ва Одилнинг совуққонлиги, Ўткирнинг супер ўйинлари бизни тарихий мундиалга олиб чиқди...

Лекин унутманг, бу ғалабада ўзбек футболи тарихидаги барчанинг ҳиссаси бор. Бу биз ҳамон футболдан кетиб мураббийликка ўтганини қабул қилолмайдиган Миржалолнинг, юзини рақиб бутсасига қўйишга қўрқмайдиган Бахтиёр Ашурматовнинг, Россияда уни ўзбек деб чақиришларидан фахрланадиган Коля Ширшовнинг, 1999 йил Миржалолнинг узатмасидан кейин БААни ўз уйида зор йиғлатган Максим Шацкихнинг ғалабаси.

Бу йўлланма ироқлик футболчининг провакациясига чидолмай қизил карточка олган Асрор Алиқуловники, Эронни енгган тарихий ўйинимизда ҳакамни қучоқлаган Азиз Ҳайдаровники, ёши катта футболчилар югурмасликда айблаган, лекин майдонда доим ҳаммадан кўп югурган Одил Аҳмедовники, биз учун доим энг севимли бўлиб қоладиган Саша Гейнрихники, доим тўп даражада бўлган Сервер Жепаровники...

Бу йўлланмада Осиё кубогига 2-рақамда бориб, биттагина ўйинда қатнашиб тарих яратган Улуғбек Бақоевнинг, футболимизнинг энг тезкор вакили Жасур Ҳасановнинг, Японияга тарихий голни урган марҳум Александр Шадриннинг, Корея билан ўйиндан кейин ноҳақ айбланган Акмал Шораҳмедовнинг, имкониятни йўқотганимизни журналистдан билгани учун ноқулай аҳволга тушган, бемаза мухлислар ноҳақ ҳақоратлаган, ҳамон футбол ўйнаётган Анзур Ислоиловнинг ҳам ҳиссаси бор.

Мен ҳозир эслолмаётгандирман, лекин ишонинг, бу йўлланма Ўзбекистон чемпионатларида зўр ўйнаган, ҳатто тўпурар бўлган, лекин миллий жамоага чақирилмаган жуда кўп ўйинчиларнинг ҳам ғалабаси. Футбол оиласини доим калака қилиб келишди, футболингиз ҳеч нарсага ярамайди, дейишди. Лекин ўшанда ҳам футболимиз даражасига шубҳа қилмаган миллионлаб мухлислар бугун мукофотланишди. Ҳақли тарзда...

Бу – дунё футболи учун ҳам алоҳида натижа. Чунки энди мундиалда қонида футбол оқадиган яна бир миллат вакиллари дебют қилади. Бу бутун футбол оламизнинг – бизга саккизта гол урган японлар, йўлланмани қўлимиздан тортиб олган Тошимицу Ёшида, ўша пайдаги ОФК мулизимлари ва Маҳмуд Абдулраҳмондан бошқа ҳамманинг байрами. Афсуски, биз уларни кечира олмаймиз...

Ва, азизлар, бу йўлланма ўзбек журналистикаси арслонлари, энг оғир паллада ҳам сўз эркинлиги аталмиш учқун ўчиб қолишига йўл қўймаган футбол журналистларининг байрами. Қанчадан-қанча устозларимиз бу кунларни кўролмай ўтишди, лекин уларнинг қилган танқидлари бугун ўз сарамасини берди. Шундай экан, дўстлар, энди байрам қилайлик, халқимиз бу яхши кунга ҳаммадан кўпроқ муносиб эди. Яшасин Ўзбекистон!

Ўткир Жалолхонов тайёрлади

Тасвирчи ва монтаж устаси – Фахриддин Ҳотамов