Дубайдаги 77 қаватли бинода ёнғин: қарийб 4 минг киши эвакуация қилинди

Бирлашган Араб Амирликларининг Дубай шаҳрида жойлашган кўп қаватли бинода 13 июнь куни кечки пайтда фалокат юз берди. «Marina Pinnacle» деб аталувчи 73 қаватли 280 метрдан зиёдроқ бинонинг юқори қаватларида ёнғин бошланиб, бир неча соат давом этди. Расмий маълумотларга кўра, ҳодиса 23:00 дан кейин содир бўлган ва 6 соат давомида ёнғин устидан назорат ўрнатилди.

Қутқарув кучлари бошчилигида Dubai Civil Defense тахминан олти соат давомида ҳаракат қилиб, ёнғинни эрталаб бостирган. Бино ичидаги 3 минг 820 киши (764 квартирада яшовчилар) эвакуация қилинган. Дастлабки маълумотларга кўра, ҳеч ким ҳалок бўлмаган; жиддий жароҳатлар қайд этилмаган. Фавқулодда хизматлар аҳолига эвакуация вақтида тиббий ва руҳий ёрдам кўрсатган.

Дубай Фавқулодда вазиятлар хизматларининг ихтисослаштирилган гуруҳлари бинони тозалаш, совитиш ва хавфни тўлиқ бартараф қилиш ишларини давом эттирмоқда. Расмийлар айни вақтда ҳам бинодан чиқаётган тутунлар уни совитиш билан боғлиқлигини ва хавфсиз эканини билдирган.

Шунингдек, ёнғин пайтида Дубаи Марина трамвай хизмати тўхтатилди, кейинчалик йўловчилар хавфсизлиги учун тикланди.

Маълумотларга кўра, Marina Pinnacleʼда илгари ҳам ёнғин ҳолатлари бўлган. Хусусан, 2015 йил 25 майда бинонинг 47-қаватида ошхона ёнғини чиқиб, 48-қаватгача тарқалган, аммо тезда ўчирилган эди.

Маҳаллий ОАВларга кўра, расмийлар ҳозирда бинони қурган компания билан бирга ҳаракат қилиб, аҳоли учун вақтинчалик яшаш жойларини ажратмоқда.

Ёнғин сабаби ҳақида ҳозирча расмий маълумотлар йўқ, лекин баҳолаш ва текширув ишлар бошланган.