Қўшимча функционаллар
-
Тунги кўриниш
“Эрон ва Исроилдаги элчихоналар ёпилмаган, 24 соат ишламоқда” – ТИВ
ТИВ расмий вакили Аҳрор Бурҳоновнинг Kun.uz’га маълум қилишича, айни вақтда Эрон ва Исроилдаги Ўзбекистоннинг элчихоналари ёпилмаган, аксинча 24/7 режимида ишламоқда. Бундан ташқари, вазирлик Ўзбекистон фуқароларидан бу икки давлатга бормасликни сўрайди. 16 июнь ҳолатига кўра, 30 дан ортиқ фуқаро Эрондан эвакуация қилинган.
Фото: Ижтимоий тармоқлар
Ташқи ишлар вазирлиги матбуот хизмати раҳбари Аҳрор Бурҳоновга кўра, айни дамда Ўзбекистоннинг Эрон Ислом Республикаси ва Исроилдаги элчихоналари ёпилмаган, аксинча фавқулодда 24/7 режимида ишламоқда. Элчихоналар ўз сайтлари ҳамда ижтимоий тармоқдаги платформалари орқали фуқароларни огоҳликка чақирган, сабабсиз кўчага чиқмасликни ва маълум қийинчиликларга дуч келганда албатта дипломатик корпусларга мурожаат қилишни сўраган.
“Фуқароларимизга иккала давлатга ҳам бормасликни тавсия қиламиз. Айни пайтда Эрон ва Исроилда бўлиб турган фуқароларимиздан эса зарурат бўлмаганда кўчага чиқмасликни, дипломатларнинг чақириқларига доимий амал қилишларини сўраймиз”, – Аҳрор Бурҳонов, ТИВ расмий вакили.
Бурҳоновнинг қўшимча қилишича, 16 июнь ҳолатига кўра, 30 дан ортиқ Ўзбекистон фуқароси Эрон ҳудудидан Туркманистон ва Озарбойжон орқали муваффақиятли эвакуация қилиниб, давлатга етказилди.
“Мазкур жараёнда яқиндан кўмак берган Туркманистон, Озарбойжон ва Эрондаги ҳамкасбларимизга чуқур миннатдорлик билдирамиз. Фуқароларимизнинг хавфсизлигини таъминлаш мақсадида барча зарур чоралар кўрилмоқда”, дейди ТИВ вакили.
