Клублар ўртасидаги ЖЧда кўпчиликка нотаниш бўлган 11 истеъдод. Кимлар турнир кашфиёти бўлиши мумкин?

АҚШда клублар ўртасидаги жаҳон чемпионати баҳслари бошланди. Дунёнинг турли чеккаларидан бўлган 32 жамоа Америкага энг кучли таркиблари билан ташриф буюрган, бу жамоаларда энди порлаётган ёш юлдузларга ҳам ўрин топилган. Қоидага кўра, ёзда ўтадиган турнирлар жаҳон футболида қатор янги номларни кашф этади. Янги форматдаги клублар ўртасидаги жаҳон чемпионати ҳам бундан истисно эмас. Қуйида турнир давомида кузатиб бориш тавсия этиладиган ёш футболчилар ҳақида маълумотлар келтирилади.

Сенни Меюлю

19 ёш, «ПСЖ», марказий яримҳимоячи
Трансфер қиймати: 15 миллион евро (Transfermarkt)

Ёш яримҳимоячи илк профессионал шартномасини 2024 йил 20 майида имзолаган. Бир йил ўтиб Меюлю «Интер» дарвозасини ишғол этди ва клублар миқёсидаги энг нуфузли турнир финалида гол урган энг ёш французга айланди, у турнир финалларида гол урган энг ёш футболчилар рейтингида Патрик Клюйвертдан кейинги учинчи ўринда.

Меюлю «ПСЖ»га беш ярим йил олдин келган. Француз футболчиси академия мураббийларида ўзининг катталардек ўйнаши билан яхши таассурот қолдирган. Унинг бу фазилатига Луис Энрике ҳам эътибор қаратди ва уни 2023 йил ноябрида асосий жамоа машғулотларига жалб этади. Кейинги йил мартига келиб Сенни мунтазам равишда «Парк де Пренс» ва Франциядаги бошқа стадионларда мунтазам равишда кўриниш бериб, мавсумдаги сўнгги тўққиз турдан саккизтасида иштирок этади.

Луис Энрикенинг схемаларида ёш футболчилар муҳим рол ўйнайди. Испаниялик мураббийнинг асосий жокерларидан бири айнан Меюлюдир. Бу мавсумда Энрике ушбу ёш истеъдодга барча турнирлар доирасида жами 29 ўйинда ишонч билдирди, фақат кўп ҳолатларда уни захира ўриндиғидан майдонга туширди. Бу ўйинларнинг деярли барчасида Сенни марказий яримҳимоячи позициясида чиққан, шунга қарамай, сермаҳсуллик намойиш этган — гол ва пас бўйича 5+3 кўрсаткичини қайд этган, жумладан ЕЧЛ финалида миланликлар дарвозасига охирги голни урган. 15 июн куни эса клублар ўртасидаги жаҳон чемпионатида «Атлетико»га қарши ўйиннинг иккинчи бўлимида захирадан майдонга тушиб, ўз номини таблога ёздириб қўйди.

У бир неча йил олдин ҳам «ПСЖ» академиясининг энг истиқболли футболчиси сифатида кўриларди. Бу мавсумда Сенни ниҳоят кўпроқ ўйин амалиётига эга бўлди, кейинги мавсумда Франция чемпионатининг энг ёрқин порлашларидан бири бўлиши кутилмоқда.

Жамоада яна кимни кузатиш мумкин: Ибраим Мбайе. 17 ёшли футболчи ёшлар ўртасидаги Чемпионлар лигасида тўрт ўйинда 2+4 кўрсаткичини қайд этди ва катталар жамоасида ўн марта майдонга тушди. Ушбу ўнг қанот вингери клуб тарихида бошланғич таркибдан ўрин олган энг ёш футболчи бўлган (16 ёш, 6 ой ва 23 кунлигида). Энрике асосий таркиб футболчилари чарчаганида Мбайега имконият бериши мумкин.

Жоб Беллингҳэм

19 ёш, «Боруссия» Дортмунд, марказий яримҳимоячи
Трансфер қиймати: 22 миллион евро

Англиялик футболчи интервюларида бир неча бор шуни такрорлаган: у ўзини акаси Жуд билан солиштиришларини хоҳламайди. Ҳатто «ўзига хослик»ка эга бўлиш учун, «Сандерленд»дан футболкасига фақат исмини ёзишни сўраган. Аммо у барибир акасининг изидан бормоқда: аввалига чемпионшипда юлдузга айланди, кейин эса Дортмунднинг «Боруссия» клубига йўл олди.

Жоб «Сандерленд»га атиги икки йил «Бирмингҳэм»дан келганди ва дарҳол асосий таркиб футболчисига айланди ва барча турнирлар доирасидаги 48 ўйиндан 44 тасида майдонга тушди. Ўтган мавсумда кичик Беллингҳэмда жиддий ўсиш кузатилди: чемпионшипда ўтказган ўйинлари сонини 100 тага етказиб қўйди, кейин эса мавсум рамзий жамоасига кирди ва энг яхши ёш футболчи учун аталган совринни ўзиники қилди.

Жоб нафақат ташқи кўриниши билан, балки ўйин услуби билан ҳам катта Беллингҳэмни эслатади. Техника, пластика — у тўп билан эстетик муомила қилиши билан ҳам Жуддан қолишмайди. Узун оқли, дриблингда эркин ва нафас қиладиган Жоб рақиб жарима майдонига киришда тез-тез муҳим узатмаларни амалга оширади — бу Криштиану Роналдунинг «Манчестер Юнайтед»даги илк йилларини ҳам эслатиб юборади. Беллингҳэм доимо совуққон, рақиб босими остида ўзини йўқотиб қўймайди.

У ўтган мавсумда «Сандерленд»нинг асосий юлдузи бўлди, «қора мушуклар»нинг АПЛга чиқишида ҳам Жобнинг хизмати катта. Усиз жамоа илк мавсумдаёқ чемпионшипга қайтиши мумкин.

Жамоада яна кимни кузатиш керак: Жейми Гиттенс. «Челси» билан 7 йиллик шартнома борасида келишиб қўйган, аммо клублар ўртасида ҳозирча музокаралар қийин кечмоқда. У ўтган мавсумнинг биринчи ярмида дортмундликларнинг асосий етакчиларидан бири эди, аммо Ковач келгач, асосий таркибдан тушиб қолди.

Франко Мастантуоно

17 ёш, «Ривер Плейт», ҳужумкор яримҳимоячи/вингер
Трансфер қиймати: 30 миллион евро

Мадриднинг «Реал» клуби яна Жанубий Америка бозорига эътибор қаратмоқда. Винисиус, Родриго ва Эндрик билан бўлганидек, «қаймоқранглилар» аргентиналик ушбу футболчи билан у ҳали балоғат ёшига етмасидан келишиб қўйди. «Ривер Плейт» 45 миллион еврога эга бўлади, Франко эса қадрдон клуби сафида охирги турнирини ўтказмоқда ва 14 августда, 18 ёшга тўлган кунида Мадридга келади.

«Реал»да бу футболчи учун рақобатчилар кўп эди: «Барселона», «Бавария», «Манчестер Сити» ва «ПСЖ» шулар жумласидан. Айниқса парижликлар Мастантуонони қўлга киритиш учун қаттиқ курашди. Ҳатто футболчи билан оғзаки келишувга эришилгани ҳақида хабарлар ҳам тарқалди. Якунда Ҳаби Алонсонинг аралашуви муҳим аҳамиятга эга бўлди: у Франкога унинг жамоадаги ролини тушунтирди ва уни етарлича ўйин амалиётига эга бўлишига ишонтирди.

17 ёшигача ушбу аргентиналик қатор рекордларни ўрнатиб бўлган:

клуб тарихидаги энг ёш гол муаллифи (16 йил, 5 ой ва 24 кунлик);
Аргентина миллий жамоасида расмий ўйинлардаги энг ёш дебютант (17 йил, 9 ой ва 23 кунлик);
Аргентина чемпионати тарихидаги энг қимматбаҳо сотув (45 миллион евро);
суперкласикода («Ривер Плейт» ва «Бока Хуниорс» дербиси) гол урган энг ёш футболчи.

Ўтган йил июлида 16 ёшли йигитча «Бока Хуниорс» дарвозасига тахминан 28 метр масофадан «тўққизлик»ка урган голи билан барчанинг тилига тушганди.  Умуман олганда, жарима зарбаларини ижро этиш унинг асосий хусусиятларидан биридир.

Аргентиналик вундеркинд – классик «ўнлик», аммо сўнгги мавсумда у кўпроқ ҳужумнинг ўнг қанотида ўйнади. Марказда ўйнаш учун аргентиналик футболчида майдонни кўриш қобилияти, футбол интеллекти, пасни ҳис қилиш ва прессингдан чиқиб кетиш қобилияти бор. Қанот учун эса – яхши бошланғич тезлик ва техника.

Ҳар қандай аргентиналик ёш футболчи каби Франко ҳам Мессининг мухлиси. «Ривер»да у 30-рақамли футболкани олгани ҳам шу билан боғлиқ – Лео фаолиятини бошлаганида айнан шундай рақамли футболкада майдонга тушган. Профессионал фаолиятининг бошида эса у ўзини «Барселона» ва шахсан Лионелнинг мухлиси деб эълон қилган. Август ойидан бошлаб эса у кумирнинг ҳаётидаги асосий рақиблари сафида ўйнашига тўғри келади.

Жамоада яна кимни кузатиш керак: Иан Субиабре. Тезкор ва дадил ҳаракатланувчи вингер. Қишда унга «Челси» қизиқиш билдирганди.

Андрей Сантос

21 ёш, «Челси», марказий яримҳимоячи
Трансфер қиймати: 35 миллион евро

Амалда Андрей 2023 йил январидаёқ «Челси» футболчиси бўлган, аммо у кўклар сафидаги илк ўйинини шу турнирда ўтказиши мумкин. Лондонликлар Сантосни «Васко да Гама»дан 12,5 миллион евро эвазига сотиб олишган. Фақат  бразилиялик футболчи Европадаги фаолиятини ҳали йўлга қўя олмади. У 2023/24 йиллар мавсумининг ярмида «Ноттингем Форест»га ижара берилди, аммо фақат иккита ўйинда қатнашди. «Челси» қишда футболчисини чақириб олди ва Англиядан ташқарига юборди: ҳавбек Франциянинг «Страсбур» клубига йўл олди. У ерда Сантоснинг ишлари юришиб кетди.

Лига 1 чемпионатида ўтган бир ярим йилликда бразилиялик футболчи дарҳол жамоанинг асосий футболчисига айланди ва французлар «Челси» билан ижара келишувини яна бир мавсумга узайтирди. Сантос уялтирмади ва чемпионатнинг ҳақиқий кашфиётига айланди. Андрей Францияда кўплаб муҳим мезонларга кўра топ даража намойиш этди. Масалан, чемпионатда энг кўп марта рақиблардан тўп олиб қўйди (110) ва ютиб чиқилган дуэллар ва муваффақиятли яккакурашлар улуши бўйича Франциянинг энг яхшиларидан бири бўлди.

Андрей — топ-чемпионатлардаги энг ёш жамоанинг муҳим футболчиси. «Страсбур»нинг ўртача ёши — 22 ёшдан ортиқроқ. Энг яқин таъқибчиси — «Челси»да — 24,3. Лига 1 ўйинларида жамоасида ундан кўпроқ дақиқа фақат Гела Дуэ бўлди (у ЕЧЛ финали қаҳрамони бўлган Дезире Дуэнинг акаси), у Сантосдан 41 дақиқа кўпроқ майдонда бўлган (2225 га қарши 2266).

Сантоснинг якунланган мавсумдаги перформансини кўплаб статистик порталлар тасдиқлайди. Масалан, Андрей Sofascore версиясига кўра Европа чемпионатларининг 21 ёшгача бўлган футболчилари рамзий жамоасидан ўрин олди (7.44 баҳо билан). Таққослаш учун: унинг яримҳимоя чизиғидаги шериклари Жоау Невеш ва Жуд Беллингҳэмнинг рейтинги ҳам деярли фарқ қилмайди — 7.45.

Сантос ҳозирда — майдон марказининг заиф нуқтаси йўқ футболчиси, аммо «Страсбур» ва лига 1 даражасини ҳисобга олганда. Чидамли ва тап тортмайдиган, бразилларга хос классик дриблинги бор ва вазиятлардан фойдаланишда ҳавбеклар учун юқори кўрсаткичга эга. Андрей кўп гол уради — якунланган мавсумда «Страсбур»да ундан кўпроқ голни (10) фақат марказий ҳужумчи Эмануэл Эмега (12) урган.  180 сантиметр бўйга эга бразилиялик иккинчи қаватда ҳам жуда яхши ҳаракат қилади — мавсумдаги барча турнирлар доирасидаги 11 голидан учтасини Андрей бош билан урган, умуман олганда эса, чемпионатда худди шу позициядаги футболчилар билан ҳаводаги тўп учун курашларнинг 95,6 фоизида устун келган. Уни замонавий бокс-ту-бокс учун эталон намуна дейиш мумкин.

Жамоада яна кимни кузатиш керак: Дариу Эссугу. «Челси»нинг навбатдаги трансфери — баҳорда 22 миллион еврога сотиб олинган. Мавсум якунларига кўра сегундага тушиб кетган «Лас-Палмас»да классик таянч яримҳимоячиси сифатида ўйнаган. Агар ўйин амалиёти берилса, уни кузатиш қизиқ бўлади.

Алваро Каррерас

22 ёш, «Бенфика», чап қанот ҳимоячиси
Трансфер қиймати: 35 миллион евро

Алваро — ўзига хос футбол жаҳонгаштаси. 22 ёшгача у тўрт бор жамоа алмаштирган, футболчиликни эса икки номдор клубда бошлаган — «Реал» ва «Манчестер Юнайтед» академияларида таҳсил олган. Каррерас «қизил иблислар» сафида барибир ўйнаб кетолмади ва фақат бир неча бор АПЛ ўйинлари қайдномасидан ўрин олиш билан чекланди.

Бир неча ижарадан кейин («Престон» ва «Гранада») чап қанот ҳимоячиси «Бенфика»да пайдо бўлди, қизиғи, у бу жамоага ҳам ижара асосида ўтганди. У ярим йил ичида «бургутлар» раҳбарларини сотиб олиш опциясини фаоллаштириш кераклигига ишонтирди — «МЮ» ҳисобига олти миллион евро ўтказиб берилди, 2023/24 йиллар мавсумини футболчи португаллар жамоасининг тўлақонли аъзоси сифатида бошлади.

Каррераснинг трансфер эпопеяси бу ёзда ҳам давом этади. «Реал» ўз тарбияланувчисини қайтаришни хоҳламоқда ва бунинг учун қизиқарли схемадан фойдаланмоқчи: трансфер учун Лиссабон клубига икки баробар ҳақ тўламаслик учун, «МЮ»дан испаниялик футболчини 18 миллион еврога қайта сотиб олиш ҳуқуқидан фойдаланишни ва Мадридга 30 миллион еврога сотишни сўрамоқда. «Бенфика» Каррерас трансфери учун мадридликлардан 50-60 миллион евро олишни кўзлаган.

Алваронинг асосий афзаллиги — майдоннинг рақиб дарвозаси томондаги учинчи қисмида фаол ҳаракатланишидир. У аввалига узун узатмалар орқали ҳужум бошлайди ва ўзи ҳам олдинга етиб боради, у шундай ўйини эвазига «Бенфика» сафида якунланган мавсумда барча турнирлар доирасидаги 50 ўйинда 4 гол уриб, 5 голга узатма берган. Чидамлилиги эвазига Алваро ўйин охиридаги қарши ҳужумларда ҳам жамоага фойда келтириши мумкин.

«Реал»да 3-4-2-1 ёки 3-5-2 схемасидан фойдаланиши кутилаётган Хаби Алонсо учун муҳим бонус: Каррерасда латерал позициясида ўйнаш амалиёти бор. Бўйи (186 сантиметр) ва тактик кўникмалари туфайли Мадрид клубининг янги бош мураббийи Алвародан турли амплуаларда фойдаланиши мумкин.

Жамоада яна кимни кузатиш керак: Андреас Шелдеруп. Ҳужумда ёрқин ҳаракатланувчи универсал. Кўпинча чап қанотда пайдо бўлади. У бошланғич таркибдан ўрин олиши даргумон, лекин унга маълум дақиқалар берилиши тайин.

Родригу Мора

18 ёш, «Порту», ҳужумкор яримҳимоячи
Трансфер қиймати: 40 миллион евро

Португалиялик истеъдодли футболчи Андре Вилаш-Боашнинг «Порту» президенти лавозимидаги асосий топилмаси бўлди. 2024 йил бошида «аждарлар» чуқур инқироз ҳолатида эди ва катта қарзга ботганди. Бундай вазиятда барча умид кўплаб юлдузларни етиштириб берган академиядан эди. Шундай ҳам бўлди.

Мора ўтган йил ёзида асосий жамоага жалб этилди, шундай экан, ҳозирги мавсум унинг учун катталар футболидаги биринчисидир. Португалиялик футболчи 17 ёшлилар ўртасидаги Европа чемпионатида ҳам кўзга ташланганди. У ерда Родригу жамоаси билан финалгача етиб бориб, беш гол урган ҳолда турнирнинг энг яхши тўпурари бўлганди.

18 ёшида у «Порту» ҳужум чизиғи етакчиларидан бирига айланди. Мавсум охирини эса жуда кучли ўтказди: сўнгги тўққиз турда Родригу 7+1 кўрсаткичига эришди. Португалия примерасида у жами 10 гол ва тўрт голли узатма билан голлар сони бўйича ҳам, «гол плюс пас» бўйича ҳам жамоада иккинчи бўлди.

Мора — кескин ўгирилишлар билан ҳаракат йўналишини ўзгартиришни хуш кўрадиган технар футболчи. Енгиллиги, осонгина тезланиши ва иккала оёқ билан ўйнаш қобилияти туфайли португалиялик  футболчи рақиблар орасидаги бўшлиқни аъло даражада топади ва улар орасида осон манёвр қилади.

7 май куни, 18 ёшга тўлганидан икки кун ўтиб, Мора «Порту» билан шартномасини 2030 йилгача узайтирди ва 70 миллион евро товон пули белгиланди. Катта эҳтимол билан, яқин келажакда у «Порту»нинг «Ан-Наср» ва «Манчестер Сити»га 60 миллион еврога сотилган футболчилари Отавио ва Нико Гонсалесни ортда қолдириб, трансфер рекордини янгилайди.

Жамоада яна кимни кузатиш керак: Саму Агехова. 193 сантиметр бўйга эга бўлган бақувват форвард «Порту»га ўтган йил ёзида «Атлетико»дан 20 миллион евро эвазига ўтганди. У Португалияда 42 ўйинда 25 гол урди ва Испания миллий жамоасида ҳам дебют қилди.

Кенан Йилдиз

20 ёш, «Ювентус», вингер/ўнлик форвард
Трансфер қиймати: 45 миллион евро

Германияда немис аёли ва туркиялик муҳожир оиласида туғилган Кенан ҳеч қачон бундестим учун ўйнамаган. 17 ёшидан Йилдиз Туркиянинг турли ёш тоифасидаги жамоалари сафида ўйнаб келади. Ушбу вундеркинд етти ёшида «Бавария» тизимида пайдо бўлган, аммо 2022 йилда «Ювентус» вакиллари уни Италияга олиб кетган. Ўшанда «Кекса синиора» уни қўлга киритиш учун «Барселона» билан рақобатлашишга тўғри келган.

Йилдиз 2023/24 йиллар мавсумида «Юве» сафидаги илк ўйинидан кейин ғалати ҳолат содир бўлади: ўйиндан кейинги матбуот анжуманида бянконериларнинг ўша вақтдаги бош мураббийи Массимилиано Аллегри туркиялик футболчини сочлари учун танқид қилади: «Кенан эртага сочини калталатиши керак, чунки у юз марта қўлларини сочига олиб борди. У соч турмагини ўзгартиради ва барчаси тўғри бўлади». Йилдиз кейинги машғулотга чиндан ҳам сочини калталатган ҳолатда келади.

Бу мавсумда Кенан — туринликлар клубидаги кам сонли ёрқин юлдузлардан бири бўлди. ЕЧЛнинг биринчи турида ПСВга қарши кечган ўйинда у Алессандро Дел Пиеронинг рекордини янгилаган ҳолда, клубнинг турнир тарихида гол урган энг ёш футболчисига айланади. Туркиялик юлдуз ўша куни 19 ёш-у 136 кунлик эди, италиялик афсона эса бироз каттароқлигида гол урган — 20 ёш-у 308 кунлигида.

Италия чемпионатида Йилдиз бутун мавсум давомида муҳим голли ҳаракатларни амалга оширди, масалан, биринчи даврада «Интер»га қарши ўйинда унинг дубли билан 2:4 ҳисоби 4:4 кўринишига келтирилади. У мавсум охирини ҳам жуда яхши ўтказди: унинг голлари ва ассистлари «Кекса синиора»га аввалига тўртликка кириш, кейин эса у ерда мустаҳкам ўрнашиб олишга ёрдам беради. А сериянинг сўнгги тўққиз туридан Кенан етти ўйинда қатнашди (икки ўйинни дисквалификация туфайли ўтказиб юборди) ва том маънода жамоани ЕЧЛга олиб чиқди: «Женоа» дарвозасига ягона голни урди (1:0), «Лечче» билан ўйинда ғалаба голи муаллифи бўлди (2:1), сўнгги икки турда ҳам астойдил ҳаракат қилди — «Удинезе» билан ўйинда (2:0) икки ассист амалга оширди, «Венеция» дарвозасига ҳам битта гол урди (3:2).

У ҳужум чизиғидаги универсал ҳисобланади. У «ўнлик» сифатида ҳам, ҳужумчи ортида ҳам ва ҳатто марказий форвард сифатида ҳам ҳаракат қилиши мумкин, аммо у ҳозирча кўпроқ ўнг қанот вингери сифатида ўйнаган. Игор Тудор туркиялик футболчидан марказга яқинроқ жойда фойдалана бошлади ва бу ўз самарасини берди. Йилдиз тўп билан яхши дриблинг қилади, тўпсизлигида — айниқса, ҳужумчи ортида ҳаракатланганида жамоадошлари учун бўшлиқлар очиб беради.

Лео Месси ҳам у келажакда катта футболчи бўлиб етишишига ишонч билдирган. Аргентиналик футболчи Adidas бутсаларининг янги модели (F50) промокампаниясида 10 нафар истеъдодли футболчини танлаган. Рўйхатга у Ламин Ямал билан бирга Йилдизни ҳам киритган.

Жамоада яна кимни кузатиш керак: Самюэл Мбангула. Ўнг оёқда ўйновчи ажойиб дриблёр. У мавсумнинг дастлабки икки турида бошланғич таркибда майдонга тушиб, 1 гол ва уч ассист муаллифи бўлганди, аммо кейин у кўпроқ захирадан ўйинга қўшиладиган бўлди.

Савио

21 ёш, «Манчестер Сити», ўнг қанот вингери
Трансфер қиймати: 50 миллион евро

Савио Бразилияни эрта тарк этган. Балоғат ёшига етиши биланоқ City Football Group у билан шартнома имзолаган ва у аввалига компания таркибидаги клублардан бири «Труа»га қўшилган. Аммо ёш бразилиялик Европага йўл олишидан олдинроқ «Атлетико Минейро»га Бразилияда требл қилишда ёрдам берган. 2021 йилда ушбу клуб А серияда, штат чемпионатида ва Бразилия Кубогида ғолиб чиққанди.

Аммо Савио Францияда ўйнаб кетолмади, миш-мишларга кўра, у фақат ўзининг севимли позициясида, ўнг қанот вингери сифатида ўйнашни истаган, «Труа»да эса бу позиция ўшанда Вилзон Одоберники эди. Аввалига ПСВга ижарага берилган бразилиялик кўп ўтмай «Жирона»да (бу клуб ҳам City Football Group таркибида) пайдо бўлади.

Испанияда ушбу вингер фақат бир мавсум ўтказди, аммо жамоага тарихий натижага эришишда ёрдам беради — учинчи ўрин ва Чемпионлар лигаси йўлланмаси қўлга киритилади, футболчининг ўзи эса ла лига ва Испания кубоги ўйинларида 11+10 кўрсаткичи қайд этади, параллел равишда муваффақиятли алдаб ўтишлар сони бўйича чемпионатда тенгсиз бўлади. Футбол ҳолдингининг асосий клуби — «Манчестер Сити» дарҳол унга эътибор қаратади.

Англияда Савионинг сермаҳсуллиги пасайди, аммо бу клуб учун инқироз ичида ўтган мавсум эди. Аммо бразилиялик футболчи доимо асосий таркиб футболчиси бўлиб қолди. У барча турнирлар доирасида 45 ўйинда майдонга тушди ва икки гол уриб, 12 голга узатма берди. Шу билан бирга, у фақат аутсайдерлар ва ўртамиёналарга қарши ўйинларда ўзини кўрсатиш билан чекланмади, масалан, «Арсенал»га қарши икки ўйинда ҳам биттадан ассист амалга оширди.

Тезкорлик – Савионинг асосий қуролидир. Бўш жойда бразилияликни шунчаки тўхтатиб бўлмайди. Агар унинг қочиб кетишига йўл қўйилса, бу катта эҳтимол билан рақиб учун ҳалокатли якун топади. Шунингдек, бразилиялик футболчининг арсеналида яхши пас ва шеригининг бошига аниқ тўп ошириш қобилияти бор. Савио қанотда рақибнинг бошини айлантириб, тўпни жарима майдони ичига оширади. Тез орада у «Ман Сити»нинг янги трансферлари – Раян Шерки ва Тиджани Рейндерс билан қанчалик яхши ўйнаб кетиши ойдинлашади.

Жамоада яна кимни кузатиш керак: Оскар Бобб. Норвегиялик футболчи Савионинг ўнг қанотдаги рақобатчиси ҳисобланади. Ўтган мавсумда Гвардиола уни асосий таркиб футболчисига айлантирмоқчи бўлганди, у мавсум бошида «МЮ»га қарши кечган Суперкубок учун баҳсни асосий таркибда бошлаганди. Аммо ўша ўйиндан кейинги машғулотларда Бобб оёғини синдириб олди ва фақат апрел ойида сафга қайтди.

Ўзбекистонлик мухлислар эса Абдуқодир Ҳусанов учун бу турнир ўзини кўрсатиш имконияти бўлишини кутишмоқда.

Александар Павлович

21 ёш, «Бавария», таянч яримҳимоячи
Трансфер қиймати: 55 миллион евро

Александар серблар оиласида ўсган, аммо ўзини ҳақиқий мюнхенлик йигит деб аташи мумкин: Бавария пойтахтида туғилган ва етти ёшида шу номли клуб академиясига кирган. Болалигида у «Алянц Арена»да бол-бой сифатида клубнинг кўплаб чемпионликларини футболчилар билан нишонлаган. Бу мавсумда Павлович ўзи ҳам шу жамоанинг асосий таркиб футболчиси сифатида кумуш товоқ билан бирга суратга тушди.

У фақат ўтган мавсум ўрталарида «Бавария»нинг асосий таркибига қўшилди, аммо қисқа вақт ичида бошланғич таркибнинг мунтазам вакили бўлиб олди. Мюнхенликлар сафидаги дастлабки ўйинларидан биридан кейин Томас Мюллер Александарни эътироф этиб, «Павлонинг мухлиси» эканини айтганди.

Жорий мавсумда ушбу таянч яримҳимоячиси жароҳат ва касалликлар туфайли кўп ўйинларни ўтказиб юборди — кузда ўмров суяги синиши туфайли бир ярим ой майдонга туша олмади, мартда эса мононуклеоз уни сафдан чиқарди. Аммо бу ҳам Павловичга Германияда мавсумнинг энг яхши яримҳимоячиларидан бири бўлишига халал бермади. Александар — бундеслигада узатмалар аниқлиги бўйича (93,5 фоиз) етакчи бўлди, чемпионат доирасидаги ўйинларда яримҳимоячилар ўртасидаги дуэлларда устун келиш бўйича (62,7 фоиз) энг яхшилар қаторига кирди.

Майдондаги позициясига кўра Павлович — таянч яримҳимоячиси. Аммо уни тоза таянч яримҳимоячиси деб ҳам бўлмайди. У ҳар бир ўйинда Киммиҳ билан биргаликда ўйин суръатини назорат қилади, улар бир-бирини ажойиб тарзда тўлдиришади: Йозуа Павловичга қараганда тўпни олдинга олиб боришга ҳаракат қилади, Александар эса анча орқароқдан туриб плеймейкерлик қилади. Шу билан бирга, Павло ўрта ва узоқ масофаларга жуда яхши тўп узатади, тез-тез диагонал узатмалар ҳам беради ва ҳимояда жуда тартибли ҳаракат қилади — у мавсум давомида атиги икки бор сариқ карточка олган.

Павлович — «Бавария»нинг сўнгги йилларда асосий жамоа даражасига чиқа олган кам сонли тарбияланувчиларидан бири. «Алянц Арена»даги фанатлар Томас Мюллер давридан буён академиядан топ футболчи етишиб чиқишини кутишарди.

Жамоада яна кимни кузатиш керак: Том Бишоф. Ҳужумкор яримҳимоячи немис футболининг ўз ёш тоифасидаги асосий истеъдодларидан саналади. Мюнхенликлар клублар ўртасидаги жаҳон чемпионатида ўйнатиш учун унинг «Ҳоффенҳайм»дан трансферини тезлатишди.

Пабло Барриос

21 ёш, «Атлетико», марказий яримҳимоячи
Трансфер қиймати: 55 миллион евро

Паблито футболдаги йўлини ўзининг ҳозирги жамоасининг ашаддий рақиби — Мадриднинг «Реал» клуби сафида бошлаган. У ердагилар олти йил давомида кичик Барриоснинг келажагини кўра олишмади ва уни академиядан кетказишади. Бундан эса Испания пойтахтининг бошқа жамоаси — «Атлетико» фойдаланиб қолади.

Барриоснинг карерасида Фернандо Торрес муҳим ўринга эга. Пабло «Атлетико» ёшлар жамоасида ўйнаган ва афсонавий испаниялик ҳужумчи қўл остида 2021/22 йиллар мавсумда ёшлар ўртасидаги чемпионатда ғолиб бўлган ва клуб тарихида биринчи марта ёшлар ўртасидаги Европа чемпионати яримфиналига чиққан жамоага етакчилик қилган.

Ўша мавсумда Паблонинг онаси вафот этади, шунинг учун Торрес ҳар куни футболчи билан суҳбатлашиб, футболдан тасалли излаш кераклигига ишонтиради. Фернандонинг ёрдами туфайли Барриос бахтсизликдан кейин тушкунликка тушиб қолмайди.

Уни Лиоренте ва Кокенинг аралашмаси дейиш мумкин. Пабло ҳам Маркос каби ишчан яримҳимоячи, бутун майдон бўйлаб ҳаракатлана олади. Аммо Мадрид клубидаги тажрибалироқ ҳамкасбидан фарқли ўлароқ, у ҳужумкор ҳаракатларга бироз камроқ йўналтирилган — айнан Коке каби жамоа ўйинини бошқарадиган кўпроқ мия маркази. Бу мавсумда ёш испаниялик «Атлетико»нинг асосий таркиб футболчисига айланди.

Ўтган йил охирида Барриосга Англиянинг топ жамоалари — «Ливерпул» ва «Манчестер Сити» қизиқиш билдирганди, баҳорда эса «Челси» ҳам уни трансфер қилишни хоҳлаб қолди. Аммо май ойида яримҳимоячи миш-мишларга барҳам берди ва «Атлетико» билан шартномани 2030 йилга қадар узайтирди.

Жамоада яна кимни кузатиш керак: Жулиано Симеоне. У бир неча клубларда ижара асосида ўйнаб келганидан кейин отасининг бошқарувидаги клубда илк тўлақонли мавсумни ўтказди. Ҳеч нарсадан тап тортмайдиган бу вингер турнирда мадридликларга катта ёрдам бериши тайин.

Эстевао Виллиан

18 ёш, «Палмейрас», ўнг қанот вингери
Трансфер қиймати: 60 миллион евро

Ёш бразилиялик Бразилиядаги газеталар саҳифаларида 10 ёшидаёқ пайдо бўлган, ўшанда у Nike билан шартнома тузган энг ёш бразилиялик футболчи бўлганди. Бу билан у Неймар (у Nike билан 13 ёшида шартнома имзолаган) ва Родригони (11) ортда қолдирган.

2021 йилда Эстевао «Крузейро»дан «Палмейрас»га ўтади ва бир неча йил ичида Жанубий Америка футболининг ҳақиқий юлдузига айланади. Янги клубида ушбу вингер дарҳол ёшлар футболидаги совринларни коллекция қилишни бошлаб, 15 ёш ва 17 ёш тоифасидаги турнирларда чемпион бўлади.

18 ёшга келиб Эстевао «Палмейрас» сафида барча турнирлар доирасида 78 ўйинда майдонга тушиб улгурганди (26 гол ва 15 голли узатма). 2024 йилда эса «яшил-оқлар» билан паулистада (Бразилиядаги энг кучли штат чемпионати) қаторасига учинчи чемпионликка эришади. Бу совринда Эстеваонинг хизмати беқиёс эди, у жамоа урган голларнинг 36 фоизига муаллифлик қилган, 31 ўйинда 13 гол уриб, тўққиз голга узатма берган.

Ўтган ёзда «Челси» тезкор ҳаракат қилиб, жанубий америкалик вундеркиндни ўзиники қилиш учун 34 миллион евро тўлади, яна 23 миллион евро бонус ваъда қилинган. Бразилиялик футболчи бир йилга «Палмейрас»да қолдирилди. У клублар ўртасидаги жаҳон чемпионатидан кейин Лондонга кўчиб ўтади.

Эстевао Неймарнинг ёшлигини эслатади — ёрқин, енгил ва дадил ҳаракат қилади — рақиблар қуршовига киришдан тортинмайди. У ҳам чинакам Joga Bonito намойиш этади: тўпни чап оёғига ёпиштириб олгандек ҳаракатланади, тезликда кетаётганида ҳам вазиятни яхши назорат қилади ва тор ҳудудларда рақибларни осонлик билан алдаб ўтади.

Эстевао жарима майдони ташқарисидан туриб кўп зарба беради, унинг зарбалари ҳам кучли, ҳам айланма траектория ҳосил қилиб учади. Ундаги аниқлик ёш Винисиусникидан яхшироқ: Вини «Фламенго»дан кетаётганида 69 ўйинда 14 гол урганди.

Уни болалигида Мессинио деб ҳам аташган, унинг ўзи афсонавий аргентиналикка ҳавас қилишини яширмаган ва ҳатто бир сафар Каталония гранди сафида ўйнашни орзу қилишини айтган: «Имкон туғилиши биланоқ «Барселона» ўйинларини томоша қиламан. Болалик орзум — қачондир «Камп Ноу»да ўйнаш. Агар орзу амалга ошса ҳам, бу кейинроқ бўлади, ҳозирча эса Эстевао «Стэмфорд Бриж»да дебют қилишга тайёрланмоқда.

Жамоада яна кимни кузатиш керак: Витор Роке. «Барса»дан кетганидан кейинги мавсумлар ўхшамади («Бетис» сафидаги 33 ўйинда 7+2 ва «Палмейрас»да 19 ўйинда 3 гол), аммо мухлислар унинг юлдузли онлари келишига ишонмоқда.