Ўмонда тутқунликда сақланган аёл ва унинг фарзандлари Ўзбекистонга қайтарилди

Дипломатлар саъй-ҳаракати билан Ўмонда оғир ҳаётий вазиятга тушиб қолган ватандошнинг Ўзбекистонга қайтиши таъминланди, деб хабар берди «Дунё».

Ўзбекистон элчихонаси маълумотига кўра, оғир ҳаётий вазиятга тушиб қолган аёл икки нафар вояга етмаган фарзанди билан ватанга қайтиш бўйича ёрдам сўраб мурожаат қилган.

Мурожаатда қайд этилишича, у 2019 йилдан буён Ўмоннинг ал-Бураймий шаҳрида, асли келиб чиқиши эронлик бўлган, лекин ҳеч бир давлат фуқаролигига эга бўлмаган Али исмли шахс билан шаръий никоҳ асосида бирга яшаган. 2020 йилда ва 2022 йилда фарзандлари дунёга келган. Бироқ, оила бошлиғининг ҳеч қандай ҳужжатга эга эмаслиги ва қонуний никоҳ шартномаси йўқлиги сабабли болаларга туғилганлик ҳақидаги гувоҳнома расмийлаштирилмаган.

Таъкидланишича, оиладаги келишмовчилик, эрнинг фарзандларга нисбатан куч ишлатиш ҳолатлари ва уларни хонадонда тутқунликда сақланиши аёлнинг Ўзбекистон элчихонасига ёрдам сўраб ариза ёзишга ундаган.

Қайд қилинишича, элчихона консуллик бўлими томонидан Ўмон давлат идораларига мурожаат қилиниб, вояга етмаган болаларга Ватанга қайтиши учун гувоҳномалар расмийлаштирилган. 18 июн куни улар Ўмон пойтахти Масқат шаҳридаги халқаро аэропортдан Ўзбекистонга учиб кетган.