Тўрт нафар инстаблогерга онлайн қимор ўйинларини реклама қилгани учун чора кўрилди

Рақобат қўмитаси томонидан ахборот ресурслари ва ижтимоий тармоқлар орқали тарқатилаётган рекламаларнинг амалдаги қонунчиликка мувофиқлиги текширилди.

Олиб борилган ўрганишлар натижасида ижтимоий тармоқларда бир нечта юз минглаб кузатувчиларга эга бўлган блогерлар ўз саҳифаларида букмекерлик хизматларини реклама қилаётган ҳолатлар аниқланган.

Хусусан, улар «Melbet» букмекерлик товар белгисидан фойдаланган ва қимор ўйинларини тарғиб қилувчи видеороликлар жойлаштирилган. Ушбу реклама материаллари қуйидаги шахсларга тегишли:

●   Шодиев Жасурбек Ғуломжон ўғли (jasjannew);

●   Нормаматов Дадабек Баҳром ўғли (allme.uz);

●   Раҳматов Шерхон Лутфулло ўғли (sherxon.zdss);

●   Ҳасанбоев Хожиакбар Зулҳайдар ўғли (hojiakbar_ku).

Ушбу блогерлар белгиланган тартибда маъмурий жавобгарликка тортилиб, тегишли ҳужжатлар судга юборилган.

Маълумот учун, «Реклама тўғрисидаги» қонунга кўра, мамлакатда қимор ўйинлари ва таваккалчиликка асосланган ўйинларни реклама қилиш тақиқланади.