Роналду Саудия Арабистонида қолди

«Ан-Наср» португалиялик ҳужумчиси Криштиану Роналду билан янги шартнома тузилганини эълон қилди.

40 ёшли футболчи билан янги келишув муддати 2027 йил ёзига қадар амал қилади.

Саудия клуби португалиялик иштирокидаги роликни намойиш этган. Видео охирида Роналду пляжда турган ҳолатда шундай дейди: «Доим „Ан-Наср“!»

«Тарих давом этади», — дейилган клуб хабарида.

Футболчининг ўзи ҳам ижтимоий тармоқлардаги саҳифаларида бу ҳақда эълон берган. «Янги саҳифа очилмоқда. Ўша эҳтирос, ўша орзу. Келинг, биргаликда тарих яратайлик», – дея ёзган Роналду.

Криштиану фаолияти давомида «Спортинг», «Манчестер Юнайтед», «Реал» ва «Ювентус» клубларида тўп сурган. У 2023 йил январида «Ан-Наср» сафига келиб қўшилганди. Ўтган вақт мобайнида форвард жамоа учун барча турнирлар доирасида 105 ўйин ўтказиб, 93 гол урган ва 19 голга узатма берган.

Роналду бу клубда қўлга киритган ягона соврин — 2023 йилда ўртоқлик мақомидаги Араб чемпионлари кубогини ютиш бўлганди. 

Якунланган мавсумда ҳам «Ан-Наср» совринсиз қолди. Ар-Риёд шаҳри жамоаси Саудия Арабистони чемпионатида 70 очко тўплаб, турнир жадвалида «Ал-Иттиҳод» ва «Ал-Ҳилол» жамоаларидан кейин учинчи ўринни эгаллаш билан кифояланди, ОЧЛни эса яримфиналда тарк этди. Шу билан бирга, Роналду ички чемпионатда тўпурар бўлди.