Трамп махсус вакили: «Иброҳим келишувлари»ни кенгайтириш бўйича муҳим баёнотлар кутиляпти

АҚШ президенти Доналд Трампнинг махсус вакили Стив Уиткофф Иброҳим келишувларига қўшилиши мумкин бўлган давлатлар билан боғлиқ муҳим эълонлар берилиши кутилаётганини айтди.

CNBC телеканали эфирида чиқиш қилган Уиткофф жорий кун тартибига изоҳ берди.

Унинг сўзларига кўра, яқинда эришилган сулҳ Исроилнинг Эронга зарбалари туфайли юзага келган кескинлашувга чек қўйди ва можаронинг узоқ давом этадиган урушга айланишининг олдини олди.

Уиткофф томонлар ўртасида кенг қамровли тинчлик битимига эришилишига умид билдирди.

У бундай келишувга эришиш имкониятини кўрсатувчи «кучли сигналлар» олаётганини таъкидлаб, Эроннинг бу жараёнга тайёрлиги ҳақида шахсий таассуротга эга эканлигини билдирди.

Махсус вакил, шунингдек, яқин келажакда Иброҳим келишувларига қўшилиши мумкин бўлган давлатлар юзасидан «муҳим баёнот» кутилаётганини айтди.

«Биз бир қатор мамлакатларда муносабатларни нормаллаштириш жараёни бошланиши мумкинлигига ишонамиз», — деди у.

Теҳроннинг ядровий дастурини шарҳлар экан, Уиткофф уранни бойитиш ва қуролланишни қайта бошлаш Қўшма Штатлар учун «қизил чизиқ» эканлигини таъкидлади.

«Уранни бойитишдан ташқари, қуролларнинг ўзи ҳам биз учун қизил чизиқдир. Биз қуролланиш пойгасига йўл қўя олмаймиз. Бу бутун минтақани беқарорлаштиради», — деди вакил.