Тошкент метросининг 13 та бекатида касса ёпилди

Тошкент шаҳри метросининг 13 та бекатидаги (Мирзо Улуғбек, Халқлар дўстлиги, Пахтакор, Ҳамид Олимжон, Пушкин, Дўстлик, Тошкент, Ойбек, Тинчлик, Шаҳристон, Бодомзор, Минор ҳамда Абдулла Қодирий станциялари) касса ёпилди, бунга чипта ҳарид қилиш кўрсаткичи кескин камайгани сабаб бўлди. Бу ҳақда «Тошкент метрополитени» хабар берди.

Қайд қилинишича, узоқ вақт давом этган кузатув ва ўрганишлар натижаларига кўра бир қанча метро бекатларидаги вестибюлларда жойлашган кассаларда чипталар ҳарид қилиш кўрсаткичи кескин камайгани аниқланган. Шу боисдан, нақд пул кўринишида тўловни амалга оширувчи йўловчилар сони кам бўлган метро бекатларидаги касса ёпилган.

Таъкидланишича, йўловчилар касса ёпилган вестибюлларда автоматлаштирилган тўлов турларининг бошқа усуллари орқали тўлов қилиш имкониятига эга (АТТО карталари, банк карталари, турли мобил иловалар, кафт орқали ва бошқа тўлов усуллари).

«Тошкент метрополитени» йўловчиларига қулайлик яратиш ҳамда касса олдидаги тирбандликларни камайтириш мақсадида метродан фойдаланишда йўл ҳақини тўлашнинг 10 дан ортиқ тури мавжуд. Жумладан, QR-кодли бир марталик чипталар 3000 сўмни ташкил қилса, бошқа тўлов усуллари 1700 сўм ва ундан ҳам арзон... Ҳозирги вақтга келиб йўловчиларнинг кам сонли қисми нақд пул кўришида, яъни кассадан QR-кодли чипта ҳарид қилиб йўл ҳақини тўламоқда. Рақамларга қарайдиган бўлсак, илгари бир марталик QR-кодли чипталардан метро йўловчиларининг 45-50% фойдаланган бўлса, ҳозирги вақтга келиб 6-7% ни ташкил қилмоқда», дейилади хабарда.