Хўжаободда профилактика инспекторини пичоқлаб ўлдирган шахс ушланди

У “Сўқолоқ“ қабристонидаги маккапоя ичида яшириниб ётганлиги аниқланган. Гумонланувчи қўлга олиш жараёнида ўзининг қорин қисмига пичоқ билан жароҳат етказган ҳамда биринчи тез тиббий ёрдам кўрсатилиб, шифохонага олиб борилган.

Хўжаобод туманидаги профилактика инспектори Абдурасул Абдувалиевни пичоқлаб ўлдирган 65 ёшли эркак қўлга олинди. Бу ҳақда ИИВ матбуот котиби хабар берди.

Маълум қилинишича, гумонланувчи Ю.Холбозоров жорий йилнинг 4 июл куни соат тахминан 6:30 ларда Хўжаобод туманининг Юксалиш маҳалласи Сўқолоқ қабристонидаги маккапоя ичида яшириниб ётганлиги аниқланган. У қўлга олиш жараёнида ўзининг қорин қисмига пичоқ билан жароҳат етказган ҳамда биринчи тез тиббий ёрдам кўрсатилиб, шифохонага олиб борилган.

Ҳозирда мазкур ҳолат юзасидан Жиноят кодексининг 97-моддаси 2-қисми “г” банди билан жиноят иши қўзғатилган ҳамда тергов ҳаракатлари олиб борилмоқда.

Эслатиб ўтамиз, 1 июл куни Хўжаобод туманида оила аъзоларига пичоқ билан таҳдид қилаётган 65 ёшли эркак, чақирувга асосан воқеа жойига етиб келган профилактика инспектори Абдурасул Абдувалиевни пичоқ билан жароҳатлаганди. ИИБ ходими шифохонага олиб кетилаётган вақтда вафот этган. Қотил эса воқеа жойидан яширинганди.

Қотиллик қурбони бўлган профилактика инспектори сўнгги манзилга давлат мадҳияси садолари остида кузатилди. Жанозада ИИБ ходимлари саф тортди ҳамда осмонга қарата ўқ ҳам узилди.

#Хўжаобод тумани