Хоминаий Исроил билан уруш бошланганидан бери илк бор омма олдида кўриниш берди

Эрон олий раҳбари, 86 ёшли Али Хоминаий Ашуро куни муносабати билан масжидда ўтказилган маросимда иштирок этди.

Давлат телевидениеси тарқатган эфирда Хоминаий масжидда йиғилган зиёратчиларни қўл силкиб кутиб олгани, улар эса ўз навбатида раҳбарни мамнунлик билан қарши олгани кўринади. Бу тадбирда олинган суратлар хорижий ОАВда ҳам тарқатилди.

Эроннинг юқори мартабали қўмондонлари ва ядрочи олимлар ўлдирилган 12 кунлик уруш даврида Хоминаий «хавфсиз жойда» бўлган. Bild газетаси экспертларга таянган ҳолда у бункердан чиқмаганини ёзган.

У бу вақт мобайнида фақат махфий жойларда тасвирга олинган видеомурожаатлар орқали чиқиш қилган. Унинг сўнгги мурожаати 26 июн куни эълон қилинганди.