АҚШ биринчи марта Украинага ёрдам кўрсатиш учун «Кўнгиллилар коалицияси» йиғилишига қўшилди

Қўшма Штатларнинг Украина бўйича махсус вакили Кит Келлог эҳтимолий сулҳдан кейин Киев учун хавфсизлик кафолатларини ишлаб чиқаётган «Кўнгиллилар коалицияси» йиғилишига қўшилган Американинг биринчи вакили бўлди. Европа давлатларига Россияга қарши санкцияларни кучайтириш бўйича қонун лойиҳасини тайёрлаган сенаторлар Линдси Грэм ва Ричард Блументал ҳам қўшилди, деб хабар берди «Коммерсант».

«Кўнгиллилар коалицияси» йиғилиши Буюк Британия ва Франция раислигида ўтмоқда. Ушбу мамлакатларнинг етакчилари - бош вазир Кир Стармер ва Франция президенти Эммануэл Макрон Лондон шимоли-ғарбидаги Нортвудда жойлашган НАТО қўмондонлик марказида.

Йиғилишнинг бошқа иштирокчилари - Италия бош вазири Жоржиа Мелони, Украина президенти Владимир Зеленский, Германия канцлери Фридрих Мерц, Полша бош вазири Доналд Туск, Нидерландия бош вазири Дик Схоф ва Европа комиссияси раиси Урсула фон дер Ляйен, шунингдек, АҚШ вакиллари Римда бўлиб, видео алоқа орқали қатнашмоқда. 10 июл куни Италияда Украинани қайта тиклаш бўйича тўртинчи анжуман ўтказилди.

«Биз ўз ишимизни тинчликка тайёргарлик кўришга қаратишимиз, бунга Путинни музокарага мажбурлаш орқали эришишимиз керак. Бу мувофиқлаштирилган босим ўз натижасини беради», деди Кир Стармер учрашувда. «Менимча, бу биз Украина хавфсизлиги ва ўз хавфсизлигимиз учун ҳаракат қилишда давом этаётган бирдамлигимизнинг ёрқин белгиси ва намунасидир», деди Жоржиа Мелони. У Америка Қўшма Штатларининг «Кўнгиллилар коалицияси» йиғилишидаги иштирокини шундай изоҳлади.

«Кўнгиллилар коалицияси» Буюк Британия ва Франция ташаббуси бўлиб, Украинада тинчлик кафолати беришга тайёр бўлган давлатларни бирлаштириши керак. Шу жумладан ўт очиш тўхтатилгандан кейин тинчликпарвар кучларни юбориш орқали.

Аввалроқ, Буюк Британия коалицияга 30 дан ортиқ давлат қўшилишни хоҳлаётганини маълум қилган эди.