Таэквондочи Улуғбек Рашидов икки йилга дисквалификация қилинди

Ўзбекистонлик таэквондочи, икки карра Олимпиада чемпиони Улуғбек Рашидов антидопинг қоидаларини бузгани учун икки йилга мусобақалардан четлаштирилди. Бу ҳақда Бутунжаҳон таэквондо федерацияси номидан Халқаро допинг тестдан ўтказиш агентлиги (ITA) хабар берди.

Агентлик баёнотига кўра, 23 ёшли спортчи 12 ой ичида уч марта қаерда экани ҳақида маълумот бермаган. Бундай хатти-ҳаракатлар антидопинг бузилиши сифатида таснифланади, чунки улар аввалдан эълон қилинмаган мусобақадан ташқари тестлар ўтказишга тўсқинлик қилади.

«Рашидов қоидабузарлик фактига эътироз билдирмади ва ITA таклиф қилган оқибатларни қабул қилди, бу эса ишни «оқибатларни қабул қилиш» буйруғи билан тугатишга имкон берди», — дейилади хабарда.

Дисквалификация муддати 2025 йил 13 майдан, ихтиёрий равишда вақтинчалик тўхтатиб туриш санасидан бошлаб белгиланади ва 2027 йил 12 майгача давом этади.

Бундан ташқари, Рашидов томонидан учинчи қоидабузарлик содир этилган пайтдан бошлаб – 2025 йил 3 февралдан тўхтатиб туриш муддати бошланишигача кўрсатилган барча индивидуал мусобақа натижалари бекор қилинади.

Қарор устидан томонларнинг илтимосига биноан Спорт арбитраж суди (CAS) апелляция бўлимига шикоят қилиш мумкин.

Спортчи Рўйхатдан ўтган тестдан ўтказиш пули (RTP)га аъзоси бўлган ва ҳар куни ўз жойлашуви тўғрисида хабар бериши ва 60 дақиқалик вақт ажратиши талаб қилинган. Бундан мақсад антидопинг ташкилотларига олдиндан огоҳлантирмасдан мусобақадан ташқари тест синовларидан ўтадиган спортчиларни аниқлаш имконини беришдир.