Чинозда опасини ўлдириб, 7 кун гилам ичида сақлаган йигитга ҳукм ўқилди

Тошкент вилояти, Чиноз туманида ўз опасини ўлдириб, 7 кун уйда сақлаган йигитга суд ҳукми ўқилди. У 8 йилга қамалди, жазони умумий тартибли колонияда ўташи белгиланди.

Қотиллик 2025 йил 14 феврал куни содир бўлган. 1999 йилда туғилган йигит 1995 йилда туғилган опасини ўлдириб, мурдасини гиламга ўраб қўйган. Орадан 7 кун ўтгач, бу ҳақда дўстларига хабар берган. Йигит сўзларига кўра, жанжал кредит туфайли юзага келган.

«Кредитдан келиб чиққан эди. Ҳолат сабаби тарбия бўлмаганидан, отамиз бўлмаган. Опам асабий эди, аммо кўпинча ярашиб кетардик. Охирги марта кредитга пул тўламай ўтказиб юбораверди. Мен пул ўтказдим. Тунда хонамга пичоқ билан келди. Пичоқни менга қаратди-да қўли пайигача кесилиб кетди. Қонни кўрганимдан кейин ўзимни бошқаролмай қолдим. Шок ҳолатида эдим. Мурдасини кўрганимдан кейин қотиллик қилганимни тушундим. Мурдани балконга чиқариб қўйдим», деди у.

Суд онанинг даъвоси йўқлигини, аёл доимий жанжаллар қилиб келганини инобатга олган ҳолда, йигитни Жиноят кодексининг 97-моддаси 2-қисмининг «ж» бандида назарда тутилган жиноятни содир қилганликда айбдор деб топди.