Reuters: Путин урушни давом эттириш ниятида

Россия президенти Владимир Путин Ғарб тинчлик ўрнатиш учун қўйган шартларни инобатга олган ҳолда Москва билан ўзаро муносабатларни бошламагунча Украинадаги урушни тўхтатмоқчи эмас. Бу ҳақда 15 июл, сешанба куни Кремлга яқин уч манбага таяниб, Reuters агентлиги хабар берди. Шу билан бирга, Россия раҳбари АҚШ президенти Доналд Трампнинг Москвага нисбатан санкцияларни кучайтиришга тайёрлиги ҳақидаги баёнотини инобатга олмайди. Қолаверса, рус қўшинлари олдинга силжиши билан Путиннинг ҳудудий талаблари кенгайиши мумкин.

Агентлик манбаларига кўра, Владимир Путин Россия иқтисодиёти ва қуролли кучлари Ғарбнинг кейинги чекловчи чораларига дош бера оладиган даражада кучли, деб ҳисоблайди. Унинг фикрича, Россия келгусидаги иқтисодий қийинчиликларни, жумладан, Вашингтон томонидан рус нефти харидорларига божлар жорий этиши мумкин бўлган вазиятни енгиб ўтишга қодир, дея таъкидлайди агентлик манбалари. «Путиннинг фикрича, ҳеч ким, жумладан, америкаликлар ҳам у билан Украинадаги вазиятни тинч йўл билан ҳал қилиш тафсилотларини жиддий муҳокама қилмаган, шу боис у ўзи хоҳлаган нарсага эришмагунча музокараларни давом эттиришга бел боғлаган», — деди Reuters манбаларидан бири.

Агентликнинг эслатишича, Путин НАТОни шарқда кенгайтирмаслик, Украинанинг бетарафлиги, русийзабон аҳоли ҳуқуқларини ҳимоя қилиш ва Украинанинг аннексия қилинган беш вилоятини Россия таркибига киргизиш бўйича қонуний мажбуриятларни талаб қилади. Шу билан бирга, «у Украина хавфсизлиги кафолатларини муҳокама қилишга тайёр», деб ёзади Reuters.

14 июл куни АҚШ президенти Доналд Трамп Владимир Путиннинг Украинада ўт очишни тўхтатиш бўйича келишувдан бош тортганидан ҳафсаласи пир бўлганини айтди. У Россияга Украина бўйича битим тузиш учун 50 кун муҳлат бераётгани ҳақида огоҳлантирди. Трампнинг сўзларига кўра, агар тинчлик келишувига эришилмаса, Қўшма Штатлар Россиянинг савдо ҳамкорларига нисбатан 100 фоиз даражасида иккиламчи тарифларни жорий қилади. Бундан ташқари, Оқ уй раҳбари тез орада Европа давлатлари билан биргаликда Украинага ҳаво ҳужумидан мудофаа тизимлари, жумладан Patriot қурилмалари, кўп сонли қурол-яроғ ва бошқа ҳарбий техника тақдим этишга ваъда берди.