Киев қурол ишлаб чиқарувчиларга маҳсулотини урушда синаб кўришни таклиф қилмоқда

Қурол-яроғ ишлаб чиқарувчи компаниялар ўз маҳсулотларини Украинага жўнатиб, улардан жанговар ҳаракатларда қўлланиши ҳақида ҳисобот олиши мумкин, дея таклиф қиляпти Киев.

Фото: Николетта Стоянова / Getty Images

Украина хорижлик қурол ишлаб чиқарувчиларга Россияга қарши урушда ўз маҳсулотларини жанговар шароитларда синаб кўришни таклиф қилди, деб хабар берди Reuters тегишли дастур ташкилотчиларига таяниб.

Украина расмийларига кўра, қурол-яроғ ишлаб чиқарувчи компаниялар ўз маҳсулотларини Украинага жўнатиши, улардан фойдаланиш бўйича онлайн тренинглар ўтказиши, сўнгра украиналик ҳарбийлар уларни синовдан ўтказиши ва жанговар техника ва қуроллардан фойдаланиш бўйича ҳисобот юборишини кутиши мумкин.

Test in Ukraine дастури Украина ҳукумати томонидан қурол-яроғ секторига инвестициялар ва харидлар учун яратилган Brave1 платформаси томонидан бошқарилади. «Бу бизга қандай технологиялар мавжудлиги ҳақида тушунча беради. Бу компанияларга ҳақиқатан ҳам олдинги чизиқда нима ишлаётгани ҳақида тушунча беради», деди Brave1 инвесторлар билан алоқалар бўлими раҳбари Артем Мороз Reuters агентлигига.

Унинг сўзларига кўра, ишлаб чиқарувчилар бундай схемага катта қизиқиш билдирган. У аниқ компаниялар номини айтмади, дастур қандай ишлаши ва агар мавжуд бўлса, қандай харажатлар талаб қилиниши ҳақида батафсил маълумот беришдан бош тортди, деб ёзади Reuters.

#Украина #қурол-яроғ