Россия мудофаа вазири собиқ ўринбосари ишида - пора бўйича яна 2 та эпизод

Россия Федерацияси Тергов қўмитаси мудофаа вазирининг собиқ ўринбосари Павел Поповга нисбатан иккита ўта йирик миқдорда пора олиш бўйича иккита иш қўзғатди, деб хабар бермоқда рус тилидаги оммавий ахборот воситалари, хусусан, ТАСС агентлиги ва «Коммерсант» газетаси 20 июл, якшанба куни манбаларга таяниб.

Ҳуқуқ-тартибот идораларидаги манбанинг ТАССга айтишича, генералга соғлиғи туфайли ҳозирча айблов эълон қилинмаган: Попов касалхонада.

Нашрларга кўра, биринчи эпизод Мудофаа вазирлиги биносида таъмирлаш ишларини олиб борган пудратчилардан бири вазирлик бошлиғи ўринбосарига 2014 йилдан 2024 йилгача Москва марказидан бепул яшаш учун квартира бергани билан боғлиқ. Иккинчи ҳолат, ТАСС манбасига кўра, худди шу ташкилот генералга Lexus LX 570 автомобилини тақдим этгани сабабли очилган. «Тергов натижаларига кўра, кўчмас мулк ва автомобил ижараси бўйича ушбу хизматларнинг умумий қиймати қарийб 34 миллион рублни ташкил этган», — дея агентлик ўз манбасидан иқтибос келтирмоқда.

Поповнинг адвокати Денис Сагач ТАСС агентлигига берган интервюсида мижозига нисбатан янги ишлар очилганини тасдиқлади.