Тошкентда беморга шилқимлик қилган шифокор 5 суткага қамалди

44 ёшли шифокор РШТЁИМ Тошкент вилоят филиалида даволанаётган бемор аёлни тиббий кўрикдан ўтказиш баҳонасида унинг танасидан ушлаб, шаҳвоний шилқимлик қилган. У ҳатто хона эшиги ва деразасини ичкаридан ёпиб олган. Бу пайтда бемор хонада ёлғиз бўлган.

Фото: Fotolia / Andy Dean

Бемор аёлга шилқимлик қилган шифокор маъмурий жазога тортилди.

Kun.uz танишган суд қарорида келтирилишича, 1981 йилда туғилган З.Т. РШТЁИМ Тошкент вилояти филиалида шифокор бўлиб ишлаган. У 2025 йил 17 июл куни соат 19:00 ларда Сергели туманида жойлашган РШТЁИМ Тошкент вилоят филиалида бемор С.А.га шилқимлик қилган.

Шифокор тиббий кўрикдан ўтказиш мақсадида беморнинг хонасига кирган. Бу пайтда бемор хонада ёлғиз бўлган. Бундан фойдаланган шифокор аёлнинг кўкраги ва танасининг бошқа қисмларидан ушлаб, унга шилқимлик қилган.

Шифокор судда айбига иқрор бўлган ва қилган ишидан пушаймонлигини, қилмишининг оқибатларини тушуниб етганини билдирган.

Жабрланувчи С.А. эса ўз кўрсатмасида суддан шифокорга қонуний чора кўришни сўраган.

“Даволаниш мақсадида шифохонага ётдим. Хонамда мендан бошқа ҳеч ким йўқ эди. 17 июл куни соат 19:00 ларда шифокор З.Т. хонамга кириб, дераза ва эшикларни ёпди. Сўнгра кўкрагим ва танамнинг бошқа қисмларидан ушлаб, ёқяптими деб сўради. Шок ҳолатда бўлганим учун ҳеч нарса қилолмадим. Шундан сўнг оила аъзоларимга мурожаат қилдим. Шифохонадан кетмоқчи бўлганимда бош шифокор рухсат бермади ва хонамга 2-3 кишини жойлаштирди”, деган аёл.

ЖИБ Сергели туман судининг қарори билан З.Т. Маъмурий жавобгарлик тўғрисидаги кодекснинг 41−1-моддаси 1-қисмида назарда тутилган (шаҳвоний шилқимлик) ҳуқуқбузарликни содир қилган деб топилди. Унга 5 сутка маъмурий қамоқ жазоси тайинланди.

#Тошкент вилояти #шифокор #шилқимлик