Россия нефт маҳсулотларининг ЕИга импорти бўйича тақиқ ярим йилга қолдирилди

Еврокомиссиянинг маълум қилишича, Россия нефтидан ишлаб чиқарилган нефт маҳсулотларини ЕИга етказиб беришга эълон қилинган тақиқ олти ойдан кейин кучга киради. Бу вақт ичида ЕК чекловларни қўллаш бўйича кўрсатмалар тайёрлайди.

Фото: Dmitry Rogulin/picture-alliance/dpa/ITAR-TASS

Россия нефтидан ишлаб чиқарилган нефт маҳсулотларини Европа Иттифоқига етказиб беришни тақиқлаш 2026 йилнинг январ ойидан кучга киради. Бу ҳақда Еврокомиссия вакили Олоф Гилл 22 июл, сешанба куни Брюсселда бўлиб ўтган матбуот брифингида маълум қилди.

«Ғоя шундан иборатки, олти ойлик ўтиш давридан кейин Европа Иттифоқи операторларига учинчи мамлакатлардан ЕИга Россия нефтидан ишлаб чиқарилган қайта ишланган нефт маҳсулотларини сотиб олиш, импорт қилиш ёки етказиб бериш учун воситачи сифатида фаолият юритиш тақиқланади. Шунингдек, бундай етказиб беришда техник ёки молиявий ёрдам кўрсатиш тақиқланади», деб тушунтирди Гилл.

«Европа комиссияси ҳозир ушбу тақиқни қўллаш бўйича кўрсатмалар бермоқчи. Хусусан, у нефт маҳсулотларини импорт қилиш билан шуғулланувчи операторлар қандай далилларни тақдим этиши кераклигини тушунтириб беради (улар Россия нефтидан ишлаб чиқарилмаганлигини тасдиқлаш учун). Биз ушбу кўрсатмани ўтиш даври тугагунига қадар нашр этиш ниятидамиз», — деди Европа Иттифоқи вакили.

21 июл куни Американинг Bloomberg агентлиги Европа Иттифоқининг ҳуқуқий ҳужжатларига таяниб, Европа Иттифоқига Россия нефт маҳсулотларини етказиб беришни тақиқлаш 2026 йил 21 январдан кучга кириши ҳақида хабар қилди.

#ЕИ #Россия #нефт