Интернетдаги қидирув учун жарима: Дума яқинида намойишчилар ушланди

Президентликка собиқ номзод Борис Надеждин ва унинг шериклари «экстремистик материалларни қидириш» қонунига қарши пикет ўтказди. Уч киши қўлга олинган.

Фото: Yulia Morozova/REUTERS

Россиялик сиёсатчи, президентликка собиқ номзод Борис Надеждин ва унинг сафдошлари Давлат думаси биноси яқинида пикет ўтказди. Улар интернетда «экстремистик материалларни қидирганлик» учун жаримани назарда тутувчи қонунга қарши чиқди. «Осторожно, новости» Telegram-каналига кўра, полиция уч кишини қўлга олган, улардан икки нафари журналист.

Ушланганлар орасида сиёсий стратег ва Надеждиннинг сайловолди штаби собиқ раҳбари Дмитрий Кисиев ҳам бор. У ушлаб олган плакатда шундай ёзилган эди: «Цензурасиз Россия учун. Оруэлл қўлланма эмас, антиутопияни ёзган».

DW нашрига берган изоҳида Надеждин бу Кисиевнинг якка пикети эканлигини таъкидлади. «Кейин тўсатдан қандайдир провокаторлар келиб, Дмитрийни тўғридан тўғри ҳақорат қилди. Мен улар билан жанжаллашиб қолдим. Ва ўша пайтда полициячилар Диманинг қўлларини жуда қаттиқ бурди ва уни автозакка олиб кетди», — дейди сиёсатчи.

Президентликка собиқ номзоднинг сўзларига кўра, янги қонун лойиҳасини қўллаб-қувватлаган россиялик депутатлар «Оруэллга кўра иш тутмоқда» (Жорж Оруэлл 20-асрда яшаган британ ёзувчиси, «1984» антиутопия романи муаллифи). «Биринчи босқич — баъзи сайтларни тақиқлаш. Иккинчи босқич эса одамларга у ерда бирор нарса қидиришни тақиқлаш. Бу деярли фикрлаш жиноятидир », деди Надеждин DW нашрига.

#намойиш #Россия #Борис Надеждин