Қўшимча функционаллар
-
Тунги кўриниш
Зеленский коррупцияга қарши идоралар мустақиллиги тўғрисидаги қонун лойиҳасини тақдим этди
Икки кун олдин Украина президенти НАБУ ва САП коррупцияга қарши кураш агентликларининг ваколатларини қисқартирди. Бу ҳам мамлакат ичида, ҳам Европа Иттифоқида кескин танқидларга сабаб бўлди. Энди у Олий Радага янги қонун лойиҳасини тақдим этди.
Фото: Vadym Sarakhan/AP Photo/picture alliance
Украина президенти Володимир Зеленский Олий Радага коррупцияга қарши кураш органлари: Миллий антикоррупция бюроси (НАБУ) ва коррупцияга қарши ихтисослаштирилган прокуратура (САП) мустақиллиги тўғрисидаги қонун лойиҳасини тақдим этди. Тегишли маълумот 24 июл, пайшанба куни Украина парламенти сайтида эълон қилинди.
Володимир Зеленский бош прокурор ваколатларини қисқартиришни таклиф қилмоқда. Энди у тергов бўлинмалари ва НАБУ ички назорат бўлимидан терговгача бўлган тергов материалларини талаб қила олмайди.
Бош прокурорга иш бўйича дастлабки терговни НАБУ ваколатидан бошқа органга ўтказиш тақиқланади, бюро томонидан ҳарбий ҳолат бўйича тергов ўтказиш имкониятини истисно қилувчи объектив ҳолатлар мавжуд бўлган ҳоллар бундан мустасно. Бундай ҳолларда қарор САП раҳбари ёки шахсан бош прокурор томонидан қабул қилинади.
Бундан ташқари, бир қатор ҳуқуқ-тартибот идораларининг давлат сирларига эга бўлган ходимлари олти ой ичида Украина Хавфсизлик хизмати (СБУ) томонидан ташкил этилган полиграфия текширувидан ўтиши керак бўлади. Тахминларга кўра, келажакда хавфсизлик ходимлари ҳар икки йилда бир марта бундай процедурадан ўтади.
