Немис стартапи АҚШда Европа учун рекорд суммага сотиб олинди

Nice технология компанияси Cognigy стартапини Европа сунъий интеллект бозори учун рекорд суммага — 955 миллион долларга сотиб олди.

Алоқа марказлари ва сунъий интеллект (СИ) учун дастурий таъминотга ихтисослашган Американинг Nice компанияси Дюсселдорфдаги Cognigy стартапини Европа сунъий интеллект бозори учун рекорд сумма – 955 миллион долларга сотиб олди. Бу ҳақда Handelsblatt ишбилармонлик газетаси хабар берди. Nice раҳбарияти 2025 йилнинг тўртинчи чорагида Cognigy'ни сотиб олиш бўйича битимни якунлашни режалаштирмоқда.

2016 йилда ташкил этилган Cognigy нафақат Европада, балки Осиёда ҳам фаолият юритади. Стартап Европадаги мижозларга хизмат кўрсатиш учун сунъий интеллект асосидаги чат-ботларнинг энг илғор ишлаб чиқувчиларидан бири ҳисобланади. Бундай ботлар мижозларнинг саволларига жавоб бериши, улар билан мулоқот қилиши ва оддий вазифаларни бажариши мумкин. Илгари мавжуд бўлган чат-ботлардан фарқли ўлароқ, Cognigy ишланмалари 100 дан ортиқ тилда ишлаши ва компаниялардаги мавжуд тизимларга бирлаштирилиши мумкин. Стартап мижозлари орасида Mercedes-Benz, DHL, Lufthansa ва Nestle бор.

Cognigy асосчилари жамоаси: Бенжамин Майр, Филипп Хелтевиг, Саша Поггеманн

Nice'нинг иш кўлами янада кенгроқ. Ҳозирда Америка концернининг мижозлари орасида Disney, Sony, Toyota ва 150 дан ортиқ мамлакатнинг бошқа компаниялари бор.

Стартап вакиллари битимни улар, мижозлар ва ҳамкорлар учун «катта қадам» деб атади. «Nice билан биз ўсишни тезлаштириш учун зарур бўлган миқёс, ресурслар ва ноу-хауга эга бўламиз», дея маълум қилди Cognigy. Бундан ташқари, стартапнинг мустақил платформаси битим якунланиб, Nice тизимларига интеграциялашганидан кейин ҳам мавжуд бўлиб қолади.

#АҚШ #стартап #СИ #Cognigy