Россия расмийлари СССРдаги каби озиқ-овқат нархини қатъий белгилаб қўймоқчи

Россия Қишлоқ хўжалиги вазирлиги мамлакатнинг йирик саноат бирлашмаларига ижтимоий аҳамиятга эга маҳсулотлар нархини чеклаш бўйича ўзгартиришлар бўйича ўз фикрларини билдиришни сўради. «Коммерсант» газетаси Миллий сут ишлаб чиқарувчилар уюшмаси, Мева-сабзавот ишлаб чиқарувчилар миллий иттифоқи, Паррандачилар миллий иттифоқи ва Россия паррандачилик иттифоқига юборилган тегишли хат ҳақида хабар берди.

Газетага кўра, Қишлоқ хўжалиги вазирлиги ҳозирда иккита тартибга солиш вариантини кўриб чиқмоқда. Биринчисига кўра, 2026 йилда сотувларнинг камида 80 фоизи чакана савдо тармоқлари томонидан тўғридан тўғри узоқ муддатли шартномалар бўйича белгиланган нархларда харид қилинадиган товарларга тўғри келади. Томонлар уларни йилига бир мартадан кўп бўлмаган ҳолда қайта кўриб чиқиши мумкин ва шартномани суддан ташқари бекор қилиш мумкин эмас. «2027 йилда узоқ муддатли шартномалар бўйича товарларни сотишнинг минимал чегараси 85 фоизга, 2028 йилда эса 90 фоизга ошади», — дейилади газетада.

Иккинчи, янада қаттиқроқ вариантга кўра, маҳсулотнинг 80 фоизи учун минимал ва максимал сотиш нархи давлат томонидан белгиланади. «Россия ҳукумати ҳосил ва триллионлик ҳарбий харажатлар билан боғлиқ муаммолар туфайли мамлакатни қамраб олган инфляция ўсишини секинлаштириш учун иқтисодиётни бошқариш бўйича совет рецептларига ўтиши мумкин», — дея изоҳ берди The Moscow Times (МТ) Россия ҳукумати ташаббусини.

Картошка, сабзи, карам, лавлаги, помидор, пиёз, сут, тухум, шакар, олма, бодринг, сут ва кунгабоқар ёғи нархи Россия ҳукумати томонидан тартибга солиниши мумкин. «Коммерсант»нинг эслатишича, бунга сабаб нархларнинг кескин кўтарилиши бўлган: шу тариқа, май ойида картошка 2,5 баравардан кўпроққа қимматлашган, «боршч тўплами» сабзавотлари эса йил сайин 87 фоизгача ошмоқда.