АҚШ Сенати Россияга қарши янги санкцияларни маъқулламасдан таътилга чиқмоқда

АҚШ Сенати Россияга қарши янги санкциялар киритиш тўғрисидаги қонун лойиҳасини қабул қилмасдан ёзги таътилга кетмоқчи. Шу тариқа, АҚШ президенти Доналд Трампга Россияга қарши ваъда қилинган санкцияларни жорий этиш ёки қилмаслик масаласини мустақил ҳал қилиш учун мутлақ ҳуқуқ берилади. Бу ҳақда The Hill хабар берди.

Яқинда Трамп Россияга қарши янги санкциялар киритиш муддатини 10-12 кунгача қисқартиришини маълум қилганди. Нашрнинг қайд этишича, агар Россия президенти Владимир Путин сулҳга рози бўлмаса, бу муддат 8 августда тугаши керак.

Шунингдек, янги божлардан нафақат Россия, балки ундан нефт сотиб олувчи давлатлар ҳам зарар кўриши мумкин. Нашрнинг таъкидлашича, огоҳлантириш сифатида Оқ уй раҳбари Россия энергия манбаларининг асосий импортчиларидан бири бўлган Ҳиндистонга қарши 25 фоизлик тарифлар жорий этилишини эълон қилган. Шуниси эътиборга лойиқки, қонун лойиҳасида иккиламчи божларни 500 фоиз миқдорида жорий этиш таклиф қилинган эди.

Таъкидланишича, сенаторлар Украинани қўллаб-қувватлаш тарафдори бўлиб, қонун лойиҳаси улар бир ойлик таътилга кетишидан олдин қабул қилинишини хоҳлаган бўлса-да, ҳеч бўлмаганда ёз охиригача Россияга қарши санкциялар қўллашнинг мақсадга мувофиқлиги ҳақидаги қарор энди тўлиқ Трампнинг қўлида қолмоқда.

Нашрнинг таъкидлашича, демократлар Трамп Путинни жазолашига шубҳа билан қарамоқда, гарчи у Кремл раҳбарининг сулҳга рози бўлишни истамаслигидан тобора кўпроқ ҳафсаласи пир бўлса-да.

Республикачилар партияси сенатори Линдси Грэм билан биргаликда санкциялар тўғрисидаги қонун лойиҳасининг ҳаммуаллифи бўлган демократ сенатор Ричард Блюментал агар Трамп ҳужжатда таклиф қилинган чекловларнинг бешдан бир қисмини жорий қилса ҳам буни ғалаба деб ҳисоблашини айтди.