Мактабга тайёргарлик: бозор қилдингизми?

Рўйхат ва сифат – биринчи ўринда

Ўқув йилига тайёргарликни муваффақиятли бошлаш учун энг аввало харидлар рўйхатини тайёрланг. Бу рўйхатда қуйидагилар бўлиши мумкин:

• Дафтарлар (ҳар бир фан учун алоҳида)
• Ручка, қалам, ўчиргич, линейка
• Қалпоқ ва қаламқутилар
• Қайчи, клей, рангли қоғозлар, рангли қаламлар (бошланғич синфлар учун)
• Мактаб сумкаси
• Мактаб формаси ва туфлилар
• Жисмоний тарбия учун алоҳида либослар ва кроссовкалар

Ҳар бир бола учун алоҳида рўйхат тузилса, ортиқча харидлардан сақланиш ва маблағни тежаш мумкин.

Қўлингиздаги маблағни “кўпроқ нарса олиш” учун эмас, “сифатли ва узоқ хизмат қиладиган нарса олиш” учун ишлатинг. Бу нуқтайи назардан олиб қаралганда, сифатли маҳсулотлар узоқ муддатда вақт ва маблағ тежайди.

Бола ҳам нарса танлашда иштирок этсин

Фарзандингизга сумка, ручка, рангли дафтар ёки ҳатто форма танлаш имконини беринг. Бундай муносабат болада:

• Мактабга бўлган ижобий муносабатни,
• Мустақил танлов қилиш кўникмасини,
• Ўзига ишончни оширади.

Шу йўл билан болангиз мактабни мамнунлик билан кутади. Материал таъминотидан ҳам муҳимроқ нарса — боланинг руҳий тайёрлиги. Мактаб муҳити, янги давр, янги талаблар болага қўрқув ёки қийинчилик келтириши мумкин. Таътил охирида боланинг уйқу режимини секин-асталик билан тўғрилаш керак.

“Сенинг қўлингдан келади”, “Бу йил сен янада зўр бўласан” каби сўзлар жуда катта аҳамиятга эга.

Ҳаммаси янги бўлиши шартми?

Йилдан йилга болалар учун ҳамма нарсанинг янгисини олиш одат тусига айланди. Аммо баъзи буюмларни тоза ҳолда, янгилаб, яна бир йилга ишлатиш мумкин.

Туфлилар яхши ҳолатда бўлса — бу йил ҳам кийса бўлади.

Эски, аммо сифатли сумка тозаланса, янгига айланиши мумкин.

Формани янгилаш керак бўлса, фақат кофта ёки шимни алмаштириб, камроқ харажат билан чиқиш мумкин.

Бу нафақат оила бюджети учун фойдали, балки фарзандга тежамкорлик, қадрлаш, етарлилик тушунчаларини ўргатади.

Ҳар бир харид, сумка тайёрлаш, рангли қаламларни кетма-кет жойлаш жараёнини бола билан бирга бажариш муҳим. Бу жараённи байрамга айлантиринг: сумкасига ўқув қуролларини ўзи жойласин, янги кийимларини ўзи тайёрласин (ёшига қараб албатта). Шу каби кичик деталлар бола хотирасида ўқишга рағбатни оширади.

Ҳар бир мактабда форма, ранг, сумка ўлчами, ҳатто қайси дафтарлардан фойдаланиш ҳақида талаблар бўлиши мумкин. Аввало синф раҳбари ёки мактаб маъмурияти билан боғланинг.

Мактабга тайёргарлик бу — шунчаки харид эмас, балки фарзанд билан муносабатни мустаҳкамлаш, уни мустақил ҳаётга тайёрлаш жараёнидир. Молиявий, психологик ва ахлоқий жиҳатдан яхши тайёргарлик кўрилса, янги ўқув йили бола ва ота-она учун ҳам яхши таассуротларга бой бўлади.