Зеленский Трамп билан урушни тўхтатиш бўйича «самарали суҳбат» ўтказди

Украина ва АҚШ президентлари 5 август куни телефон орқали мулоқот қилди. Бу ҳақда Володимир Зеленский маълум қилди.

«Президент Трамп билан самарали суҳбат. Асосийси, албатта, урушни тўхтатиш ҳақида. Биз АҚШ президентидан барқарор ва узоқ муддатли тинчлик учун барча саъй-ҳаракатлари учун миннатдормиз. Дарҳақиқат, қотилликларга имкон қадар тезроқ барҳам бериш керак, биз буни тўлиқ қўллаб-қувватлаймиз. Агар руслар урушни чўзиб юбормаганида, кўп ойлар урушсиз ўтиши мумкин эди», деб ёзди Украина президенти.

Зеленский сўзларига кўра, у Трампни яқинда Россиянинг Киев ва Украинанинг бошқа шаҳарларига берган зарбалари ҳақида хабардор қилган.

«Вазиятга биргаликда баҳо бердик: россияликлар зарбаларнинг шафқатсизлигини оширди», деди у.

Шунингдек, томонлар Россияга қарши санкцияларни муҳокама қилган.

«Россиянинг иқтисодиёти пасайишда давом этмоқда ва айнан шунинг учун Москва президент Трампнинг бу истиқболи ва қатъиятини ҳисобга олмоқда. Бу кўп нарсани ўзгартириши мумкин», деди Зеленский.

Америка томони ҳозирча Трамп ва Зеленскийнинг бўлиб ўтган музокараларига изоҳ бермади.

Июл ойи охирида Доналд Трамп Россия Украина билан ўт очишни тўхтатиш бўйича келишув тузиши учун 10 кунлик муддат - 8 августгача муҳлат белгилаганди. АҚШ президентининг айтишича, бу муддат тугагач, Вашингтон Москвага нисбатан божлар ва «бошқа чоралар» жорий қилади.

Владимир Путин АҚШ президентининг ўт очишни тўхтатиш ҳақидаги талабига тўғридан-тўғри жавоб бермади. Reuters хабарига кўра, Путин Трампни «ғазаблантиришни» истамайди, Вашингтон ва умуман Ғарб билан муносабатларни яхшилаш имкониятини қўлдан бой бераётганини тушунади, аммо унга ҳарбий мақсадлар муҳимроқ.